«3 մատի կոմբինացիա» Սամվել Բալասանյանին

Վերլուծական 27 Հուլիս, 2012 10:41

Հետաքրքիր իրադարձություն է տեղի ունեցել երեկ Կառավարության նիստի ժամանակ. Տիգրան Սարգսյանի ղեկավարած նախարարների կաբինետը «3 մատի կոմբինացիա» է ցույց տվել ԲՀԿ պատգամավոր, Գյումրու քաղաքապետի «նախագահական» թեկնածու Սամվել Բալասանյանին:

ԱԺ նախկին փոխնախագահը կառավարություն էր ներկայացրել 5 օրենսդրական նախաձեռնություն, որոնցից 3-ը նոր օրենքներ են, իսկ երկուսը` փոփոխություններ գործող օրենքներում: Բալասանյանն առաջարկում էր օրենք ընդունել «Գյուղատնտեսության մասին», «Փոքր եւ միջին ձեռնարկատիրության զարգացման եւ պետական աջակցության մասին», «Բազմազավակ մայրերի պետական խրախուսման մասին»: Փոփոխություններ են առաջարկվել «Գյումրի քաղաքի վերականգնման մասին», «Օտարերկրացիների մաuին» օրենքներում:

Մինչ խանդավառված ու ոգևորված Ս. Բալասանյանը PR ակցիաներ էր իրականացնում իր հեղինակած օրենքների մասին՝ հավանաբար մտածելով, որ իրեն հռչակելու էին մերօրյա գլխավոր օրինաստեղծներից մեկը` Կառավարությունը մերժել է բոլոր օրինագծերը: Նման բան հազվադեպ է լինում, երբ միանգամից բոլոր օրինագծերն էլ մերժվեն, սակայն կատարվել ու արդեն արձանագրվել է փաստը:

Այստեղ ուշագրավն այն է, որ մերժվել են ոչ թե սովորական պատգամավորի նախաձեռնություններ, այլ ՀՀԿ-ԲՀԿ միասնական թեկնածու Սամվել Բալասանյանի: Այսինքն գլխավորապես ՀՀԿ-ականներից կազմված կառավարությունը մերժել է քաղաքապետի պաշտոնում իր կողմից սատարվող թեկնածուին՝ այսպիսով ծնելով մի շարք հարցականներ: Օրեր առաջ Սամվել Բալասանյանը հայտարարեց, որ ինքը նախագահական էր գնացել ոչ թե «դաբրո» ստանալու, այլ նախագահի հետ քննարկելու «Գյումրի քաղաքի վերականգնման մասին» օրենքում փոփոխություններ կլատարելու, և, ըստ Բալասանյանի հայտարարության, նախագահը հավանել էր իր առաջարկությունները` դրանք համարելով չափազանց նպատակահարմար: Ու հիմա կառավարությունը մերժել է «խիստ նպատակահարմար» օրինագիծը:

Արդյոք սա չի՞ նշանակում, որ Բալասանյանի խնդիրներն այնքան էլ հստակ չեն, որ հենց թեկուզ վարչապետ Տիգրան Սարգսյանը դեմ է նրա՝ Գյումրիի քաղաքապետ դառնալուն: Գուցե նման հրահանգ նա ստացել է անձամբ Սերժ Սարգսյանից, քանզի հազիվ թե վարչապետը դեմ գնար նախագահին... Բոլորն էլ հասկանում են, որ հատկապես հիմա Բալասանյանի հեղինակած ցանկացած օրինագծի հաստատում դիտարկվելու է նրա քարոզչության մի մաս և առավել է ամրապնդելու նրա դիրքերը՝ այսպես գյումրեցի ընտրողներին համոզելով, որ նա շատ պետքական մարդ է, հոգ է տանում Գյումրու մասին...

Այսինքն, նախագահի «ադաբրյամսն» առավել կամրապնդեր և առավել դյուրին կդառնար նրա ընտրության հարցը, սակայն Բալասանյանին կառավարությունը «նոկաուտ» է հասցնում՝ հասկացնել տալով, որ տակավին նրան չի համարում յուրային, մանավանդ գիտի, որ Բալասանյանը ցանկացած պահի կարող է մի կուսակցությունից մյուսը թռիչք կատարել: Սակայն այստեղ միայն կուսակցություն փոխելու խնդիրը: Չի բացառվում, որ արդեն մի նոր քննարկում է տեղի ունեցել Սերժ Սարգսյանի և Գագիկ Ծառուկյանի միջև, որի ընթացքում որոշվել է փոխել «խաղացողներին»: Բալասանյանի թեկնածությունը միանշանակ չընդունվեց, գուցե Ծառուկյանն էլ տեղեկացավ այն խաղերին, որոնք «կյանքի են կոչվել» թիվ 35 ընտրատարածքն ընդգրկող գյուղական բնակավայրերում: Այստեղ մեծամասնական ընտրակարգով պատգամավորության թեկնածու առաջադրված Սամվել Բալասանյանն իրեն անհրաժեշտ ձայները ստացավ, իսկ ահա ԲՀԿ-ն պարտվեց:

Այս երևույթը հասկանալու համար պետք է հետադարձ հայացք հառել 2007 թվականի ԱԺ ընտրություններին, երբ Ս. Բալասանյանի սեփականաշնորհած ընտրատարածքում հաղթանակ տարավ ոչ թե ՕԵԿ-ը, որի համամասնական ցուցակի երրորդ հորիզոնականն էր զբաղեցնում Բալասանյանը, այլ՝ «Բարգավաճ Հայաստանը»: Բալասանյանը, ինչպես վկայում էին ընտրողները, կոչ էր արել մեծամասնականով ձայն տալ, համամասնականով՝ Գագիկ Ծառուկյանի կուսակցությանը... Այս մասին հետո տեղեկացվեց Արթուր Բաղդասարյանին, ուստի նա առանձնակի ցավ չապրեց, երբ Բալասանյանն իր «անկախությունը հռչակեց», իսկ հետո էլ անդամակցեց ԲՀԿ-ին, որն իրեն պաշտոն էր խոստացել՝ Արևիկ Պետրոսյանին պաշտոնանկ անելու հաշվին: Հիմա դարձյալ նույն «խաղաձևն» է գործել, ըստ որի գյուղական համայնքներում Բալասանյանի ընտրողները քվեարկել են նրա և ՀՀԿ-ի օգտին: Իսկ այստեղ Բալասանյանին աջակցել է նաև Շիրակի մարզպետ Աշոտ Գիզիրյանը: Այսինքն, գործ ունենք բազմաֆիգուր կոմբինացիայի հետ...

Սամվել Բալասանյանի վիճակն իսկապես հիմա վատացավ, որովհետև նա մեծ «խաղադրույք» էր դրել օրինագծերի վրա, նա կարող էր հայտարարել գյումրեցիներին, որ նախագահն ու կառավարությունն իր կողքին են, ուստի իր դեմ խաղ չկա: Բայց պարզվեց, որ կա... Եվ այն էլ՝ բավական հետաքրքիր խաղ: Ըստ այդ խաղի առաջին նախապայմանի՝ սա նախազգուշացում էր Բալասանյանին, որպեսզի «երեսփոխանություն» չանի և չպահպանի իր ԲՀԿ-ական դեմքը, այլ այսօր իսկ մտածի հանրապետականանալու մասին, քանի որ սրան կարող են հաջորդել նոր անակնկալներ: Այսինքն, իշխանությունները մի կողմից տարփողելով, թե Բալասանյանը մեր մարդը չէ, այլապես կընդունվեին նրա նախաձեռնությունները, մյուս կողմից էլ Բալասանյանին էլ հասկացնում է, որ հաջողության հասնելու և Գյումրու քաղաքապետի պաշտոնը զբաղեցնելու համար պիտի հնազանդվես և հերթական անգամ փոխես «տիրոջդ» ու գուցե նաև մտածես ճակատիդ դաջվածքը փոխելու մասին...

Նարեկ Լևոնյան