Հայաբնակ հողերի արժեքը՝ 7 միլիոն

Ինչպես պարզվել է՝ Ֆրանսիան Առաջին համաշխարհային պատերազմից հետո իրեն անցած Ալեքսանդրեթի սանջակը 1939 թ. ոչ թե պարզապես հանձնել է Թուրքիային, այլ վաճառել է 7 միլիոն ֆրանկով։ Այս տեղեկությունը հաստատող փաստաթուղթը հայտնվել է թուրքական Vatan թերթի թղթակցի մոտ։

Ըստ այդ փաստաթղթի՝ Թուրքիայի կենտրոնական բանկից Ֆրանսիային է փոխանցվել 7 միլիոն ֆրանկ, ինչի դիմաց Հաթայ նահանգը (Ալեքսանդրեթի սանջակ) փոխանցվել է Թուրքիային։ Համաձայնագրի տակ ստորագրել են Թուրքիայի բոլոր բարձրաստիճան պաշտոնյաները՝ ներառյալ նախագահ Իսմեթ Ինոնյուն և վարչապետ Ռեֆիք Սայդամը։

1939 թ. այդ տարածքում բազմաթիվ հայեր էին ապրում, ովքեր ֆրանսիական կառավարության այդ քայլով նորից կանգնեցին բնաջնջման վտանգի առաջ և ստիպված էին լքել իրենց բնակավայրերը։ Սակայն այնտեղ մնացին և այժմ էլ համառորեն շարունակում են գոյատևել Վաքըֆ գյուղի բնակիչները։ Այն այսօր Թուրքիայի միակ հայաբնակ գյուղն է, որը հստակ պահպանում է իր հայկական ինքնությունը։