Շողոքորթությունը դարձել է քաղաքական կատեգորիա. Գուրգեն Եղիազարյան

Շողոքորթությունը դարձել է քաղաքական կատեգորիա, «շողոքորթեմ քեզ մի հատ, ազիզ ջան», այս խորագրի տակ։ Այս մասին այսօր՝ օգոստոսի 29–ին, լրագրողների հետ հանդիպման ժամանակ ասաց Ազգային անվտանգության նախկին փոխնախարար Գուրգեն Եղիազարյանը։

Գուրգեն Եղիազարյանի խոսքով՝ վարչապետ Նիկոլ Փաշինյանի քայլերն ուղղված են Ամուլսարի հանքի ոչնչացմանը։

«Ըստ տարածվող լուրերի՝ հանդիպում է տեղի ունեցել Ծաղկաձորում, որտեղ Նիկոլը նորից իր թիկունքից է խոսել, իրեն պաշտպանելուց է խոսել։ Փաստորեն, 2 ձեռքով ուղիղ բռնել է այդ ղեկը եւ շարժվում է դեպի Ամուլսարի ոչնչացում, հայ ազգի ոչնչացում»,– ասաց Եղիազարյանը։

Եղիազարյանը նաև նշեց, որ շատ ՔՊ–ականներ Ամուլսարի վերաբերյալ իրենց դիրքորոշումը փոխել են։

«Այսօր ով կխոսի Ամուլսարի մասին, որ այն պետք է հանք լինի, նա հայ ազգի դավաճանն է։ Բոլոր այն ՔՊ–ականները, որոնք ուրիշ կեցվածք ունեին, տեսեք, թե 2 տարի առաջ ինչ էին գրում Ամուլսարի վերաբերյալ, հիմա կամաց–կամաց սկսել են շողոքորթել։ Շողոքորթությունը դարձել է քաղաքական կատեգորիա, «շողոքորթեմ քեզ մի հատ, ազիզ ջան», այս խորագրի տակ»,– ասաց Գուրգեն Եղիազարյանը։