Կովկասյան փողոցում դիտահոր է վերակառուցվում: Արաբկիրում կլինեն ջրի անջատումներ

Այսօր «Երևան ջուր» ընկերության «Արևմուտք» շահագործման տնօրինության «Արաբկիր» տեղամասի աշխատակիցները Կովկասյան փողոցում, Դավթաշենի կամուրջի հարևանությամբ, վերակառուցում էին մի խոշոր դիտահոր:

Ըստ տեղամասի ջրամատակարարման ինժեներ Մհեր Մելեցյանի՝ տվյալ դիտահորում անցած տասնամյակների ընթացքում ձևավորվել էր մի ջրաբաշխիչ հանգույց, որի արդյունավետությունը խիստ կասկածելի էր: Տեղում խաչաձևվող երեք խոշոր ջրագծերով վայրկյանում հոսում էր մոտ 70 լիտր ջուր, որը շատ մեծ քանակ է տարածքի համար, մինդեռ վերջինիս կառավարելության մակարդակը չէր գոհացնում: Կար հիմնավոր կասկած, որ, չնայած փականի առկայությանը, այնուամենայնիվ որոշակի քանակությամբ ջուր կորչում էր:

Հուլիսի 27-ին, դիտահորի վերակառուցման աշխատանքներով պայմանավորված, դադարեցվել էր Գյուլբենկյան փողոցի 37-ից բարձր կենտ շենքերի, Հ.Էմին փողոցի 1-20 առանձնատների և 2, 4, 6, 5, 7, 10 շենքերի, Սևքարեցի Սաքո փողոցի 1-9, Կովկասյան փողոցի 1-5 առանձնատների, Բակունց փողոցի 1-6 առանձնատների և 1, 2, 4 շենքերի, Ա.Խաչատրյան փողոցի 1-10, Հակոբյան փողոցի 12 ու Կոմիտաս պողոտայի 1 շենքերի, Կիևյան 1-ին նրբանցքի, Քեռու, Բարբյուսի, Սևաստոպոլյան, Սեպուհի փողոցների և հարակից տարածքների ջրամատակարարումը:

Մհեր Մելեցյանի ասելով, նախկին 500մմ տրամագծով խողովակի փոխարեն արդեն հաջորդ առավոտից տարածքի ջրամատակարարումը կիրականացվի 200մմ տրամագծով խողովակով, որի վրա կտեղադրվի համապատասխան փական: Մյուս երկու ըստ էության ավելորդ խողովակները, ինչպես նաև հնամաշ փականը ապամոնտաժվում էին: Արդյունքում՝ կշահեն թե´ սպառողները և թե´ ընկերությունը: