Շնորհավորանք՝ տողատակով. Պուտինի մեսիջը Նիկոլ Փաշինյանին

Վերլուծական 31 Օգոստոս, 2019 20:00

Ռուսաստանի Դաշնության Նախագահ Վլադիմիր Պուտինը շնորհավորական նամակ է հղել Հայաստանի Հանրապետության երկրորդ Նախագահ Ռոբերտ Քոչարյանին՝ ծննդյան օրվա կապակցությամբ։ Ըստ Ռոբերտ Քոչարյանի ֆեյսբուքյան պաշտոնական էջի, նամակում, մասնավորապես, ասվում է․ «Հարգելի Ռոբերտ Սեդրակի, ընդունեք անկեղծ շնորհավորանքներս 65-ամյակի կապակցությամբ։ Ձեր բազմամյա պետական գործունեությամբ Դուք արժանի հարգանք եք վաստակել ինչպես հայրենակիցների շրջանում, այնպես էլ արտերկրում, նշանակալի ավանդ եք ներդրել ժամանակակից Հայաստանի զարգացման և Անդրկովկասի՝ անվտանգության և կայունության ապահովման գործում»։

Իհարկե Անդրկովկասի անվտանգության և կայունության ապահովումը պատահական չէ տեղ գտել ՌԴ նախագահի շնորհավորանքի մեջ: Սա բացահայտ ակնարկ է Հայաստանի գործող իշխանություններին, հակադրում Նիկոլ Փաշինյանին, ով, ըստ էության, լուրջ հարված հասցրեց այդ վերոնշյալ անվտանգությանը և կայունությանը՝ խնդիրներ առաջացնելով ՀԱՊԿ աշխատանքներում և հարվածելով այս կառույցի միջազգային հեղինակությանը:

Պուտինի շնորհավորանքը հարկավոր է դիտարկել նաև վերջին շրջանում հայկական մեդիա դաշտում տարածվող այն թեզի շրջանակներում, թե Նիկոլ Փաշինյանը, գնալով որոշակի զիջումների, ստիպել է ռուսներին ձեռքները լվանալ Քոչարյանից: Այլ կերպ ասած՝ ռուսական կողմը ցույց է տալիս, որ այդ թեզը կեղծ է, և իրենք երկրորդ նախագահին «ժերտվա» տալ չեն պատրաստվում: Ավելին, հոկտեմբերին Պուտինը ժամանելու է Հայաստան, և բնավ էլ բացառված չէ նրա հանդիպումը երկրորդ նախագահ Ռոբերտ Քոչարյանի հետ: Իսկ եթե այդ հանդիպումը տեղի ունենա բանտում, դա լուրջ հարված կլինի Նիկոլ Փաշինյանի ողջ քաղաքական թիմին:

Ռուսական կողմը ցույց է տալիս, որ պատրաստ է գնալ նաև այդ քայլին: Ինչո՞ւ: Ինքը՝ Փաշինյանը, անցած տարի Պուտինի շնորհավորանքը պայմանավորեց միջանձնային ջերմ հարաբերություններով, այն, որ երկրորդ նախագահը և Վլադիմիր Պուտինը մտերիմ ընկերներ են, չի թաքցրել նաև Քոչարյանը, իր իսկ խոսքերով՝ ՌԴ նախագահի և իր միջև որոշակի քիմիա կա: Կա՞ արդյոք նմանատիպ քիմիա Փաշինյանի՝ գերտերությունների ղեկավարների հետ ունեցած միջանձնային հարաբերություններում: Կա՞ն արդյոք նման հարաբերություններ ընդհանրապես, թերևս՝ ոչ: Լուկաշենկո, Մեդվեդև, ովքեր չեն էլ փորձում թաքցնել իրենց սարկազմը ՀՀ վարչապետի հետ հանդիպումների ժամանակ: ԱՄՆ նախագահ Թրամփը այդպես էլ հանդիպման չի արժանացնում Փաշինյանին, ԵՄ երկրների ղեկավարները չեն շտապում օգնության ձեռք մեկնել, ՌԴ նախագահն էլ շնորհավորում է Փաշինյանի կողմից բանտ նստեցրած երկրորդ նախագահին: Այս ամենը ֆիքսում ենք առանց չարախնդալու, իրականում՝ ցավով: Քանի որ երկրի ղեկավարը առ այսօր անտեսված է միջազգային հանրության, համաշխարհային լիդերների կողմից, իսկ դա նշանակում է ՝ անտեսված է նաև Հայաստանը: