Իտալացի մասնագետները հետաքրքրվել են Դադիվանքի վանական համալիրի վերականգնման ծրագրով

Ս. թ. նոյեմբերի 22-25-ը Հայաստան և ԼՂՀ են այցելել հուշարձանների վերականգնման և տարբեր ենթակառուցվածքների ներդրման լավագույն փորձառություն ունեցող իտալական «Անաստասիաս» հիմնադրամի ղեկավար Ռիկարդո Ակվիլայի գլխավորած պատվիրակությունը, որի կազմում ընդգրկված էին տարբեր ոլորտների, այդ թվում Հռոմի վերականգնողական կենտրոնական ինստիտուտի վերականգնող մասնագետներ, ճարտարապետ, ինժեներ, մի շարք ընկերությունների ներկայացուցիչներ, ովքեր ճանաչողական շրջայցի արդյունքում հետաքրքրություն են ցուցաբերել Դադիվանքի վանական համալիրի վերականգնման և դրա շրջակա տարածքի զարգացման ծրագրերով:

Այցի ընթացքում կողմերը մի շարք մասնագիտական հանդիպումներ ու քննարկումներ են անցկացրել ԼՂՀ պատկան մարմինների հետ: Իտալական պատվիրակության անդամները յուրաքանչյուրն իր մասով ներկայացրել է այն ոլորտը, որի համար պատասխանատու է և պատրաստակամ է ներդնելու իր հնարավորությունները: Հանդիպում է կայացել նաև Լեռնային Ղարաբաղի կառավարությանն առընթեր զբոսաշրջության վարչության պետ Սերգեյ Շահվերդյանի, Դադիվանքի վանական համալիրի վերականգնող ճարտարապետ Սամվել Այվազյանի հետ: Վերջինս պատվիրակությանը ներկայացրել է ինչպես վանական համալիրի պատմությունը, այնպես էլ տարիների ընթացքում կատարված վերականգնողական աշխատանքները: Կողմերն անդրադարձել են նաև մասնագիտական խնդիրներին` մասնավորապես հուշարձանի վերականգնման նախագծի հաստատման ընթացակարգերին` յուրաքանչյուրը ներկայացնելով իրենց երկրի առանձնահատկությունները: 

Այցելության ավարտին կողմերը մեկ անգամ ևս պատրաստակամություն են հայտնել հետագա արդյունավետ երկկողմ ու եռակողմ համագործակցության վերաբերյալ, որն էլ առաջիկայում կամրագրվի փոխըմբռնման հուշագրով: