Հերթական խոստումն էլ «գրվեց սառույցին». գծատերերը հանգիստ շունչ կքաշեն

Նոր ուսումնական տարվա սկզբից Երևանում առկա շարժակազմից երթուղի դուրս կգա հավելյալ 100 հասարակական տրանսպորտային միջոց, որպեսզի տրանսպորտային խնդիրները մեղմվեն: Այս մասին հայտնել է Երևանի քաղաքապետարանի տրանսպորտի վարչության պետ Հենրիկ Նավասարդյանը: Դժվար չէ իհարկե հիշել քաղաքապետ Հայկ Մարությանի նախընտրական այն խոստումները, որոնք կապված էին Երևանի տրանսպորտային խնդիրների լուծման հետ: Նոր տրանսպորտային ցանցի ներդրում և իհարկե՝ ձերբազատում գծատերերից, որոնց Մարությանը մինչ ընտրվելը մեղադրում էր բոլոր հավանական և անհնարին մեղքերի մեջ:

Այսօր պարզվում է՝ գծատերեր այլևս չկան, կան միայն օրինապաշտ տնտեսվարողներ: Ոչինչ չի՞ հիշեցնում արդյոք: Վարչապետ Նիկոլ Փաշինյանն էլ վարչապետ ընտրվելուց հետո հայտարարեց, որ Հայաստանում այլևս չկան օլիգարխներ, կան միայն գործարարներ: Պատմությունը, ինչպես ասում են, կրկնվում է: Փաստորեն, Հայկ Մարությանը ոչ միայն չի պատրաստվում գծատերերի ոտքը կտրել, այլ մի բան էլ օգնության ձեռք է մեկնում նրանց: Կիսաքանդ գազելները ևս չեն հանվում շահագործումից, և քաղաքապետարանը, փաստորեն, խնդրի ժամանակավոր լուծում է առաջարկում, սակայն պարզից էլ պարզ է, որ այդ լուծումը ներկայիս տրանսպորտային ցանցի պայմաններում միայն ավելի է վատթարացնելու առանց այդ էլ կաթվածահար եղած երթևեկությունը:

Երևանցիները ունեն օբյեկտիվ հիմքեր կասկածելու, որ քաղաքապետը որոշակի համաձայնության է եկել գծատերերի հետ և այդ իսկ պատճառով է մեղմել իր մոտեցումը նրանց հանդեպ: Վերջիններս էլ «արխային» են և գիտեն, որ իրենց շահերը պաշտպանվում են ամենաբարձր մակարդակում, իսկ ահա թե ով պետք է պաշտպանի երևանցիների շահերը, դեռևս հարց է: Գուցե Մարությանը այտեղ էլ իր փայն ունի, և դա է պատճառը, որ հեշտությամբ աչք է փակում իր իսկ տված խոստումների վրա: Սակայն, հաշվի առնելով նախկինում տրված և չկատարված խոստումները՝ աղբահանություն, վերելակների փոփոխություն, կարմիր գծերի վերացում, կարելի էր ենթադրել, որ այս մեկ խոստմանն էլ սպասվում է նույն ճակատագիրը…