Համագործակցության նոր եզրեր առողջապահության ոլորտում

ՀՀ առողջապահության նախարար Դերենիկ Դումանյանն ընդունել է Մարսելի փոխքաղաքապետ Դիդիե Պարակյանին:

Հյուրը նախարարին է ներկայացրել Երևան-Մարսել քույր քաղաքների միջև առկա փոխգործակցության շրջանակները և ցանկություն հայտնել առողջապահության ոլորտում ևս ծրագրեր իրականացնել: Նա նշել է, որ Մարսելի հիվանդանոցները համակարգող մարմինը պատրաստ է համագործակցել բժիշկների վերապատրաստման, փորձի փոխանակման, բժշկական սարքավորումների տրամադրման և այլ ուղղություններով: Փոխքաղաքապետը նաև առաջարկել է պարբերաբար համատեղ կազմակերպել անվճար վիրահատություններ, որոնք կիրականացնեն Մարսելից ժամանած փորձառու բժիշկները:

Նախարար Դումանյանը ծրագրային բոլոր առաջարկներն էլ ընդունելի է համարել և հավելել, որ 88-ի երկրաշարժից հետո սփյուռքի գրեթե բոլոր հայ բժիշկները սերտ համագործակցում են Հայաստանի առողջապահության բնագավառում: Նախարարը վկայակոչել է Հայ բժիշկների համաշխարհային կոմիտեն, որը գործում է 1973 թվականից և 4 տարին մեկ, իսկ 2001-ից 2 տարին մեկ համախմբում է աշխարհասփյուռ հայությանը բժիշկների միջազգային համագումարի դրոշի ներքո:

Դերենիկ Դումանյանը պատրաստակամություն է հայտնել աջակցելու առողջապահության ոլորտի զարգացմանը միտված ցանկացած նախաձեռնության: