«Հրապարակ». Վարդան Ղուկասյանին խորհուրդ են տվել. «Առժամանակ սսկվի»

Վարդան Ղուկասյանին քաղաքական «հայրերը» խորհուրդ են տվել. «Առժամանակ սսկվի, գնացել ես էն մարդու մոտ, բան եք խոսել: Համբերի՝ տեսնենք ինչ է լինում»: Խոսքը նախագահական այցի և Սերժ Սարգսյանի հետ զրույցի մասին է: Վարդան Ղուկասյանը հույսը չի կորցնում, որ իրեն թույլ կտան առաջադրվել որպես քաղաքապետի թեկնածու:

Քննարկման փուլում է Սամվել Բալասանյանի ընտրատարածքից Վարդանիկի՝ պատգամավոր առաջադրվելու տարբերակը ևս: Հիշեցնենք, որ նախնական պայմանավորվածությամբ այնտեղից պատգամավոր պետք է առաջադրվի մայիսի 6-ի ընտրություններում Մարտուն Գրիգորյանից պարտություն կրած Արման Սահակյանը: Պատգամավոր դառնալու հեռանկարն առանձնապես չի ոգևորել Վարդանիկին. մտերիմների շրջանում ասել է. «Ես ցուցակում էի, ետե իրենք գուզեին, օր ես պատգամավոր դառնայի, թող շնորհքով ըսեին, օր՝ դուրս արի քաղաքապետի պաշտոնից, արի խորհրդարան, հըմի ինչի՞ կըսեն էդ մասին»:

«Հըմի» էլ «չեն ըսի»: Պարզապես սա Հովիկ Աբրահամյանի պլան «բ»-ն է, որպեսզի Վարդանիկին վերահսկողության տակ պահեն, և վերջինս անկառավարելի քայլեր չանի: Շատերը պնդում են, որ Վարդանիկի հետևում այլ «կոնկուրենտ ֆիրմաներ» են իրենց ձեռքերը տաքացնում, որպեսզի ոչ միայն իրավիճակը Գյումրիում դառնա անկառավարելի, այլև Արման Սահակյանը չդառնա պատգամավոր: Խնդրի առնչությամբ արձակուրդում գտնվող Սերժ Սարգսյանը դեռ բան չի ասել՝ բոլորը սպասում են, որ գա ու իր «տղամարդկային խոսքն ասի»: