Փաշինյանը փորձում է թույլ չտալ «կոնսենսուս -1» ձևաչափի ձևավորումը

Վերլուծական 6 Սեպտեմբեր, 2019 16:30

«Սասնա Ծռեր» համահայկական կուսակցության Քարտուղարությունը հաղորդագրություն է տարածել՝ վարչապետ Նիկոլ Փաշինյանի հետ երեկ ունեցած հանդիպման արդյունքներով: Ըստ այդ հաղորդագրության՝ վարչապետի հետ քննարկվել են ներքաղաքական հետաքրքրություն ներկայացնող մի շարք հարցեր: Այս հանդիպման մասին լուրերը հանրության շրջանում լուրջ ռեզոնանսի արժանացավ՝ հաշվի առնելով ոչ վաղ անցյալում երկու կողմերի միջև տարվող հեռակա, սակայն բացահայտ փոխհրաձգությունը:

Սակայն Փաշինյանը պարզապես ստիպված է մոռանալ նախկինում եղած բոլոր հակասությունները: Բանն այն է, որ Փաշինյանը, հաշվի առնելով ներքաղաքական դաշտում տեղի ունեցող վերջին իրադարձությունները, ամեն գնով փորձելու է թույլ չտալ երկրորդ նախագահ Ռոբերտ Քոչարյանի կողմից առաջ քաշված «կոնսենսուս - 1» բանաձևի իրագործումը: Եվ պարզ է, որ դրա համար Փաշինյանին անհրաժեշտ է քաղաքական դաշտի հնարավորինս շատ խաղացողների բերել իր ծիր՝ թույլ չտալով, որպեսզի աշխատի Քոչարյանի քաղաքական «ձգողականությունը»:

Ինչպես երկրորդ նախագահն է բնութագրել, «Կոնսենսուս մինուս մեկ» բանաձևն այն է, որն ունի ձև ու բովանդակություն։ Ձևը վերաբերում է այս իշխանական դեմքերին ու տեսակին լրիվ այլ տեսակ հակադրելուն, իսկ բովանդակությունը՝ Հայաստանի ու Արցախի զարգացման տեսլական ներկայացնելուն։ Այս ձևաչափը, անշուշտ, իշխող քաղաքական ուժի և անձամբ Նիկոլ Փաշինյանի համար լուրջ ռիսկեր է պարունակում, հաշվի առնելով, որ առաջ քաշած այդ բանաձևում մինուս մեկը հենց ինքն է: Հետևաբար թեժ աշնան նախաշեմին Փաշինյանն անցել է հակազդող քայլերի, որոնցից մեկն էլ Սասնա ծռերի հետ հանդիպումն է՝ ընդհանուր օրակարգի քննարկմամբ: Անշուշտ, իշխանություններին նաև մտահոգում է նոր դեմքերով, նոր քաղաքական ուժի ձևավորման հավանականությունը, ինչը կարող է իրականություն դառնալ, եթե ի վերջո կոնսենսուս մինուս մեկ բանաձևը կյանքի կոչվի: Հետևաբար, կարելի է ենթադրել, որ նման հանդիպումները այսուհետ ավելի հաճախակի բնույթ են ստանալու, և Փաշինյանը փորձելու է իր շուրջ համախմբել հնարավորինս մեծ թվով քաղաքական ուժերի:

Մյուս կողմից, Սասնա Ծռերը հայտնի են իրենց արևմտյան կողմնորոշմամբ ու հակառուսական հայացքներով, և այս կուսակցության ներկայացուցիչների հետ հանդիպելով՝ Փաշինյանը նաև մեսիջ է հղում արևմուտքին՝ փորձելով ամրապնդել հարաբերություններն արևմտյան թևի հետ՝ ՌԴ նախագահ Վլադիմիր Պուտինի՝ հոկտեմբերին սպասվող այցին ընդառաջ: