Ստեփանակերտի օդանավակայանից թռիչքները կսկսվեն մոտակա շաբաթներին

Ստեփանակերտի նորակառույց օդանավակայանից թռիչքներ կիրականացվեն մոտակա շաբաթների ընթացքում։ Արցախի վարչապետ Արա Հարութունյանը օրերս հայտարարել է, որ օդանավակայանի տեխնիկական հագեցումն ավարտվել է և թռիչքներ չիրականացնելու միակ պատճառը ինքնաթիռների բացակայությունն է։ Ներկայումս ինքնաթիռ ձեռք բերելու միջոցներն արդեն առկա են։ Պահանջվող գումարը նվիրաբերել է արգենտինահայ գործարար Էդուարդո Էռնեկյանը։

Արցախի կառավարությանն առընթեր Քաղավիացիայի վարչության պետ Դմիտրի Ադբաշյանը հայտարարել է, որ մոտակա շաբաթներին օդանավակայանը առաջին օդանավերը կընդունի։ Անդրադառնալով Ադրբեջանի կողմից հնարավոր խոչընդոտներին՝ նա ասել է. «Ադրբեջանը ստորագրել է միջազգային կոնվենցիա, որով իրենք պարտավորվում են չսպառնալ ուղևորատար ինքնաթիռների անվտանգությանը»:

«Արցախ-աերոնավիգացիայի» տնօրեն Նորայր Սաֆարյանը նշել է, որ եթե Ադրբեջանը համաձայնի համագործակցել, ապա հնարավոր է՝ Արցախով թույլ տրվի իրականացնել Նախիջևան-Բաքու չվերթներ։

Դմիտրի Ադբաշյանը նշել է, որ սկզբում թռիչքներ կիրականացվեն Երևան-Ստեփանակերտ և հակառակ ուղղություններով, սակայն հետագայում կընդլայնվի չվերթների ցանկը։

Եթե այս ամենին ավելացնենք վերջերս ԵԱՀԿ Մինսկի խմբի համանախագահների հայտարարությունն այն մասին, թե կողմերից երաշխիքներ են ստացվել, որ քաղաքացիական օդանավերի նկատմամբ ուժ չի կիրառվի, ապա կարող ենք սպասել, որ օդանավակայանը վերջապես կսկսի գործել։