Մարտերը տարածվում են Հալեպի հայկական թաղամասեր

Սիրիայի կառավարական զորքերը շաբաթ օրը սկսել են Հալեպ քաղաքի՝ նախկինում հակակառավարարական զինված խմբավորումների կողմից գրավված մի շարք թաղամասերի մաքրումը։ Հաղորդում է Agence France-Presse-ը՝ հղում անելով Լոնդոնում գտնվող «Մարդու իրավունքներին հետևող մոնիտորինգի սիրիական կենտրոնին» (OSDH)։

Մարդու իրավունքների սիրիացի պաշտպանները և ակտիվիստնեը հայտնում են կատաղի բախումների մասին Հալեպի Սադահ էդ-Դին թաղամասում, որտեղ և տեղակայվել են մեծ թվով զինված ընդդիմադիր խմաբվորումներ։ «Վերջին մի քանի օրերի ընթացքում քաղաքի մատույցներում կուտակված ռազմական համալրումը ուղղվում են դեպի Սադահ էդ-Դին թաղամաս, որտեղ և գտնվում են ամենամեծ թվով զինյլաներ... Մենք կարող ենք ասել, որ հարձակումը սկսվել է», - Agence France-Presse գործակալությանը տված հարցազրույցում ասել է OSDH-ի ղեկավար Րամի Աբդուրահմանը։

Հալեպում իրադարձությունների ականատեսներից մեկը ավելի վաղ РИА Новости–ին հայտնել էր, որ երկու օր առաջ, գիշերը Սադահ էդ-Դին թաղամասում արգելափակման մեջ գտնվող զինյլաները փորձել են դուրս գալ շրջափակումից, սակայն ետ են մղվել կառավարական զորքերի կողմից։

Իսկ սիրիական SANA գործակալությունը հաղորդում է, որ նախօրեին Սիրիայի բանակը «մաքրումներ» է իրակացրել Դամասկոսի արվարձաններում, ինչի արդյունքում ոչնչացվել է զինյալներով լի հինգ բեռնատար ավտոմեքենա, ինչպես նաև բռնագրավվել են հակակառավարական զինված խմբավորումների համար նախատեսված մի շարք պահեստներ և զենքով լի մեքենաներ։ Բացի այդ, ռեյդերից մեկի արդյունքում Սիրիայի բանակի զինծառայողները ազատել են նախկինում զինյալների կողմից առևանգված իտալացի երկու ինժեների։

Նշենք նաև, որ Aleppo Armenians facebook-յան էջի հաղորդմամբ, Հալեպ քաղաքի հյուսիսային մասում, որտեղ և գտնվում են մի շարք հայկական թաղամասերը, ևս ընթանում են մարտեր, սակայն համեմատաբար ավելի մեղմ։ Հայկական որոշ թաղամասերում աշխատուժի և ալյուրի պակասից առաջացել են նաև հացի մատակարարման հետ կապված խնդիրներ։