Մակականերն ուղեղի ճառագայթման արդյունքում ավելի են խելոքացել

Գիտնականները ցուցադրել են, որ մակակա կապիկների մտածողության թեստերի արդյունքները կարելի է բարելավել օպտոգենետիկ միջոցներով՝ լուսային ազդանշանի միջոցով հատուկ ակտիվացնելով ուղեղի անհրաժեշտ հատվածները։ Հետազոտությունը տպագրվել է Current Biology պարբերականում, որի համառոտ բովանդակությունը ներկայացրել է NewScientist-ը։

Ռեզուս-մակականերին սովորեցրել են հետևել էկրանի վրա շարժվող կետերին։ Կենդանիները պիտի իրենց հայացքը բևեռեն այն կետին, որն ավելի պայծառ է մնացածներից։ Վարժեցնելիս կենսաբանները հետևում էին, թե խնդրի լուծման ընթացքում կապիկի ուղեղի որ հատվածն է ակտիվանում։

Երբ հեղինակները պարզել են, թե ուղեղի որ հատվածներն են պատասխանատու սովորելու գործում, նրանք կապիկներին ներարկել են հատուկ վիրուս՝ օժտված լուսազգայուն իոնային ուղու գենով։ Լույսի ազդեցությամբ այդ ուղին ունակ է ակտիվացնել նեյրոնները։ Քանի որ վիրուսը ներարկվել է միայն սովորելու համար պատասխանատու հատվածներում, նման ազդեցությունը թույլ էր տալիս ընտրողաբար ակտիվացնել անհրաժեշտ գոտիները։

Այս քայլից հետո գիտնականները կրկնել են կետին հետևելու թեստը։ Այս անգամ առաջադրանքի կատարումից առաջ կապիկների ուղեղները ճառագայթել են լույսով (որն այնտեղ է ուղղվել լուսատարային մանրաթելով)։ Պարզվել է, որ նման ակտիվացումը կարող է բարելավել առաջադրանքի կատարումն ավելի քան 10 տոկոսով։ Բացի այդ, համաձայն դեռ չտպագրված տվյալների, որքան ավելի բարդ է խնդիրը, այնքան արդյունքն ավելի լավն է։

Ավելի վաղ գիտնականները ցուցադրել են, որ նման օպտոգենետիկ մեթոդիկաները կարելի է կիրառել հիշողության ուսումնասիրություններում։ Վերջերս տպագրված աշխատանքում հետազոտողները ցույց են տվել, որ հիշողության ակտիվատորի դերում կարող է լինել ընդամենը մի քանի նեյրոն։