«Արաբական գարուն» և ժողովրդավարություն. «Euronews»

Եթե մինչ «արաբական գարունը» մարդիկ պատրաստակամորեն «Facebook»–ում սեղմում էին «հավանել» կոճակը՝ հետևելով Թունիսում, Եգիպտոսում և Լիբիայում տեղի ունեցող հեղափոխություններին, ապա այժմ շատերն իրենց անհանգստությունն են արտահայտում շարիաթի, բազմակնության տարածման կամ էլ իսլամիստական կուսակցությունների ընտրություններում հաջողությունների վերաբերյալ:

Այս և նման հարցերի վերաբերյալ «Euronews»-ին իր տեսակետներն է հայտնել Իտալիայի հայտնի լրագրող, ԵԽ պատգամավոր և «Սիրում եմ Իտալիան» կուսակցության հիմնադիր՝ Մագդի Կրիստիանո Ալլամը: Վերջինս նշել է, որ «Այդ երկրներում (արաբական երկրներում) հասարակության հիմնական խնդիրը ոչ թե ժողովրդավարությունն է կամ էլ քաղաքացիական ազատությունը, այլ աղքատությունն ու գործազրկությունը: Մենք սխալվում էինք՝ վերագրելով այն որևէ այլ նկրտումների: Եվ այսօր մենք տեսնում ենք, թե ինչպես են իսլամիստներն իրենց ձեռքը վերցնում իշխանությունը, իսկ իշխանություններն ասում են, որ շարիաթի սկզբունքներով են շարժվելու։ Այնպես որ, կարծում եմ՝ մենք պետք է հասկանանք, որ ընտրությունները ոչ միշտ են հանդիսանում ժողովրդավարության հոմանիշները։ Դա ընդամենը գործիք է ժողովրդավարության համար, և անհրաժեշտ է ընտրական գործընթացի մասնակիցներից պահանջել, որպեսզի հետևեն ժողովրդավարության հիմքում ընկած համապատասխան արժեքներին»։

«Մենք ապրում ենք ազատ և ժողովրդավարական երկրում. եթե մենք քննադատում ենք քրիստոնեությունը, ապա վիրավորում ենք կաթոլիկ եկեղեցուն և հենց քրիստոնեական հավատքը՝ անձամբ Հռոմի պապին, ապա մենք կարող ենք հայտարարել, որ խոսքը գնում է խոսքի ազատության սահմանափակումներին։ Սակայն մենք նույն բանը չենք կարող ասել Իսլամի վերաբերյալ։ Եթե մենք վիրավորենք կամ քննադատաբար խոսենք Մուհամեդ մարգարեի մասին, ապա դրա համար կարող ենք հատուցել միայն արյունով, որը չի ընդունվում քրիստոնեական կրոնում»։ 

Մագդի Կրիստիանո Ալլամը լրագրողին ասել է, որ իսլամի հետևորդներին և հատկապես իսլամական ինտեգրիստներին պետք է հասկացնել, որ Եվրոպան ընդունում է բոլորին։ Սակայն դրան զուգահեռ, նրանք, ովքեր որոշել են բնակություն հաստատել Եվրոպայում՝ օրինակ Իտալիայում, պարտավոր են հարգել տեղի հասարակության հիմնարար արժեքները, այդ թվում և կրոնի ազատությունը։

Իտալացի քաղաքական գործիչը նաև հավելել է, որ արաբական երկրներում գոյություն ունեն իշխանության միայն երկու մոդել՝ ռազմական իշխանություն և կրոնական ինշխանություն։ «Այդ երկրներում գոյություն չունի միջին խավ, որը կկարողանա արտահայտել իր քաղաքացիական դիրքորոշումը։ Եվ մենք՝ եվրոպացիներս, պետք է նպաստենք այդ միջին խավի ստեղծմանը. դա կայուն ժողովրդավարություն ստեղծելու միակ ուղին է։ Իսկ այն, ինչ կատարվում է հիմա Թունիսում՝ իսլամական ինտեգրիստների հաղթանակը, ինձ շատ է անհանգստացնում։ Պատմությունը մեզ սովորեցրել է, որ երբ իսլամիստներն իշխանությունը իրենց ձեռքն են վերցնում, ապա այլևս նրանք չեն վերադարձնում այն»,– ասել է Ալլամը։