Մաշտոցի պողոտա-Սարյան փողոցի հատվածում թատրոն կկառուցվի՞

Սոս Սարգսյանի ղեկավարությամբ գործող «Համազգային» պետական թատրոնի նոր շենքի կառուցման վերաբերյալ այսօր տեղի ունեցավ հանրային քննարկում, որի ժամանակ պարզ դարձավ, որ նախատեսվում է կառուցել Մաշտոցի պողոտա-Սարյան փողոցի հատվածում գտնվող այգու վերջնամասում:

«Տարիներ շարունակ թատրոնը տեղից տեղ է տեղափոխվել: Մեր մտավորականների վերաբերմունքն ինձ անհանգստացնում է: Նրանցից մի քանիսը դեմ են, որպեսզի թատրոնը ստեղծվի: Ռեստորան չենք կառուցում, այլ մշակութային կենտրոն»,- ասաց Սոս Սարգսյանը:

Երևան քաղաքի գլխավոր ճարտարապետ Նարեկ Սարգսյանի խոսքով՝ Երևանի կենտրոնում շատ դժվար է գտնել ազատ տարածք և այս տարբերակն ամենահարմարն է, քանի որ կանաչ գոտի չի համարվում, և բարեկարգված չէ: «Այդ տարածքում թատրոնի շենք կառուցելով՝ մենք բարեկարգում ենք կենտրոնական փողոցներին մոտ գտնվող ազատ տարածքը»,- ասաց քաղաքի գլխավոր ճարտարապետը:

ՀՀ վաստակավոր ճարտարապետ Հրաչ Պողոսյանի խոսքերով մոտ 350 տեղանոց թատրոն է նախագծվել, նաև ցանկություն կա Սարյան փողոցի կողմից սկսվող թատրոնի կտուրը ծառուղու վերածել, «այնտեղ մարդիկ կարող են ոչ միայն զբոսնել, այլեւ այն կծառայի որպես ամառային դահլիճ»,- նշում է ճարտարապետը ր հավելում,- «գոյություն ունի ճարտարապետների մի խումբ, որը դեմ է նշված տեղում թատրոնի կառուցմանը, բայց դա ոչ միայն հնարավոր է, այլև՝ ցանկալի: