Էս կառավարությունից ու պետությունից ես ընդհանրապես հույս չունեմ. գյումրեցի Հենրիկ պապ

Բնակարանների վիճակահանությունից հետո, քաղաքաշինության նախարար Սամվել Թադեւոսյանի գլխավորությամբ, տեղի ունեցավ բնակարանային շինարարության ծրագրի շրջանակներում կառուցվող բնակելի տների բաշխման հանձնաժողովի հերթական նիստը: Նիստում քննարկվեցին Շիրակի մարզի գյուղական բնակավայրերում երկրաշարժի հետեւանքով անօթեւան մնացած, սահմանված կարգով հաշվառված մոտ 40 ընտանիքների փաստաթղթային փաթեթները:

Մինչ հանձնաժողովի նիստը՝ ինչ-ինչ պատճառներով բնակարան չստացած, բայց մինչ օրս դեռ մերժում չստացած 50-60 քաղաքացիներ ժամերով սպասում էին քաղաքաշինության պետական տեսչության Շիրակի բաժնի պետ ժորա Միքայելյանի աշխատասենյակի դռան մոտ՝ ակնկալելով՝ ինչքան հնարավոր է շուտ մտել նախարարի մոտ ու իր վերջո ստանալ իրենց խնդրի շուրջ պարզաբանումներ կամ լուծում: Քաղաքացիների հիմնական դժգոհությունները վերաբերում էին կորցրած բնակարանների սենյակների թվի կրճատման,1988-ի երկրաշարժի ժամանակ բնակարանի օրդեր չունենալու, կամ երկրաշարժից հետո այն ստանալու ու փաստաթղթային բազմաթիվ այլ խնդիրների հետ:

-Երկրաշարժին կորցրել ենք բնակարանը: Գործերի մեջ պլյուս է դրվում, բայց հենց հերթը հասնում է բաշխմանը՝ մեր բնակարանը չեն հատկացնում: Պատճառն այն է, որ մենք բնակարանի օրդեր ստացել ենք 1990թ.-ին: Էն ժամանակ էլ կար էդ կաշառք հասկացողությունը ու շենքը բաշխելու ժամանակ՝ կոպերատիվ հիմունքներով կառուցված շենքի վարչության նախագահը 500 ռուբլի էր վերցնում ու հարկերը ծախում: Բնակարան ստանալու ժամանակ հայրս խոսացել էր նախագահի հետ, որ 500 ռուբլի տար երկրորդ կամ երրորդ հարկում բնակարան ստանալու համար, բայց վիճակահանությամբ բաժին ընկավ 4-րդ հարկ, ինչի պատճառով էլ հայրս խոստացված գումարը չտվեց ու մեզ բնակարանի օրդեր չտվեցին,-պատմում է 50-ամյա տիկին Զոյան:

Տիկին Զոյայենց բնակարանի օրդերը նրանց է տրվել արդեն 1990թ.-ին: «Կաշառակերության զոհ դարձանք ու հիմա էլ հայտնվել ենք այս իրավիճակում»:

45-ամյա Թագուհի Հովհաննիսյանը չգիտի, թե ինչու՞ վիճակահանություններին իրենց չեն հրավիրում: Նրան ոչ մի անգամ չեն զանգել, կանչել, բայց ոչ էլ ասել են՝ որ մերժվում է: Այսօր նրանից պահանջել էին ներկայացնել ամուսնու՝ գյուղում ունեցած սեփականության վկայականը: Նա նաեւ նշեց, որ ամուսնուց բաժանվել 14 տարի առաջ ու չի հասկանում, թե նրա ունեցած սեփականության վկայականն ինչու են պահանջում:

75-ամյա Հենրիկ պապը կորցրել է 3 սենյականոց բնակարան, բայց հիմա նրա ընտանիքին հատկացնում են միայն մեկ սենականոց: Սենյակների թվի կրճատումը պատճառ է վերջինիս տղայի՝ Ռուսաստանի դաշնության քաղաքացիություն ունենալը:

-Աշխատանքի բերումով նա ձեռք է բերել Ռուսաստանի քաղաքացիություն, բայց նրա ընտանիքի անդամները Հայաստանի քաղաքացի են ու ապրում են ինձ հետ: Եկել եմ, բայց հույս չունեմ, այսինքն՝ էս կառավարությունից ու պետությունից ես ընդհանրապես հույս չունեմ: Բոլոր իշխանավորները ընտրվում են միայն իրենց կարիերայի համար,-ավելացրեց Հենրիկ պապը:

Հավաքվածներից շատերը դրական պատասխան չէին էլ ակնկալում ու, դուրս գալով սենյակից, ասում էին. «Սրանք չէ-ից ու չի լինի-ից բացի, ուրիշ բան չգիտեն»: Հավաքվածներից շատերն էին ափսոսանք հայտնում, որ մինչեւ այսօր դեռ չեն լքել հայրենիքը ու ապրում են Հայաստանում. «Անօրեն երկիր կապրինք, ինչի ենք մնացել ստեղ՝ ես էլ չգիտեմ: Սրանք սաղ հայաթափությամբ են զբաղվում»:

Սոնա Առաքելյան

Asparez.am