Արմեն Աշոտյան. «Մենք կարևորում ենք նոր և ինտենսիվ որակի համագործակցությունը»
Աշխարհ
ՀՀ կրթության և գիտության նախարար Արմեն Աշոտյանն այսօր ընդունել է ՄԱԿ-ի մանկական հիմնադրամի (UNISEF) հայաստանյան ներկայացուցիչ Հենրիեթ Արենսին, ով վերջերս է ստանձնել իր առաքելությունը մեր երկրում:
Ողջունելով հյուրին՝ նախարարը հույս է հայտնել, որ ՀՀ ԿԳ նախարարության և UNISEF-ի համգործակցության արդյունավետ փորձը հնարավորություն կտա ձևավորել համատեղ աշխատանքի նոր ուղղություններ՝ հօգուտ Հայաստանի երեխաների: «Մենք կարևորում ենք նոր և ինտենսիվ որակի համագործակցությունը, հատկապես, երեխաների իրավունքների պաշտպանությունն ու նրանց ապագայի համար հուսալի և ամուր հիմքերի ստեղծումը: Ինչպես նաև երեխայակենտրոն կրթական միջավայրի ապահովումը կրթության և գիտության նախարարության գերակայությունն է», - մասնավորապես նշել է նախարար Ա. Աշոտյանը: ՄԱԿ-ի մանկական հիմնադրամի հայաստանյան ներկայացուցիչ Հ. Արենսին, նշելով, որ հաճույքով է աշխատանքի անցել մեր երկրում, ընդգծել է, որ UNISEF-ի համար կրթության ոլորտն առանցքային է: Հանդիպման ընթացքում անդրադարձ է եղել Կրթության և գիտության նախարարության և ՄԱԿ-ի մանկական հիմնադրամի կողմից համատեղ իրականացվող ծրագրերին, որոնցից կարևորվել է հատկապես համագործակցությունը ներառական կրթության ոլորտում: ՀՀ ԿԳ նախարարն ընդգծել է, որ ներառական կրթության ոլորտում Հայաստանը համարվում է տարածաշրջանում առաջատարը և նշել, որ այս ուղղությամբ մշակվում են նոր ծրագրեր: Կողմերը պատրաստակամություն են հայտնել ապահովել բոլոր համատեղ ծրագրերի արդյունավետ իրականացումն ու շարունակականությունը, ինչպես նաև քննարկել նոր նախագծեր: