«Ես Հայաստանի ապագան տեսնում եմ Եվրասիական միության մեջ». Հայկ Բաբուխանյան

ԱԻՄ կուսակցության նախագահ, «Իրավունք» թերթի խմբագիր Հայկ Բաբուխանյանը ռուս–ամերիկյան հարաբերությունների նման լարվածության պայմաններում Հայաստանի համար առավել նախընտրելի է համարում Եվրասիական միության մեջ ինտեգրվելը։ Այս կարծիքը վերջինս հայտնել է նոյեմբերի 29–ին` «Փաստարկ» ակումբում լրագրողների հետ հանդիպմանը։

«Տարածաշրջանում մենք ունենք առավելություն. եթե Վրաստանն Եվրասիական միության թշնամին է, Ադրբեջանը, համենայն դեպս, բարեկամը չէ, ապա Հայաստանը բարեկամ է։ Մենք պետք է կարողանանք օգտագործել մեր ստարտային շահավետ վիճակը», – կարծում է նա։  

Եվրասիական մեդիաֆորումից օրերս վերադարձած ԱԻՄ նախագահն ստեղծված հզոր բևեռի՝ Եվրասիական միության զարգացման ուղիներից մեկը համարում է ռազմականը։ «Ռուսաստանի նախագահի վերջին հայտարարությունները, որ տեղադրվելու են հրթիռներ, ենթադրվում է նաև, որ Հայաստանը, որպես ՀԱՊԿ–ի անդամ մասնակցելու, այդ պրոցեսների մեջ է ներգրավվելու այս կամ այն ձևով՝ և՛ որպես ՀԱՊԿ–ի անդամ, և՛ որպես պետություն, որտեղ տեղակայված է ռուսական բազա», – նշեց Հայկ Բաբուխանյանը, հավելելով, որ  երբ Մեդվեդևն ասում է, որ ռուսական հրթիռները պետք է տեղակայվեն Ռուսաստանի հարավային  ուղղությունների վրա, ենթադրելի է, որ Հայաստանի ռուսական բազան այստեղ անմասն չի մնա։

Այնուամենայնիվ, եզրափակելով թեմայի վերաբերյալ իր դիտարկումները՝ Հայկ Բաբուխանյանը նշեց. «Ես Հայաստանի ապագան տեսնում եմ Եվրասիական միության մեջ»։