200,000 բնակիչ երեկ փախել է Հալեպից

Մոտ 200,000 բնակիչ ստիպված է եղել փախչել Սիրիայի տնտեսական մայրաքաղաք Հալեպից, երբ հուլիսի 28-ին կառավարական զորքերը սկսեցին հակագրոհը։ Այս մասին կիրակի օրը Նյու Յորքում՝ ՄԱԿ-ի գլխավոր գրասենյակում, ասել է ՄԱԿ-ի մարդասիրական հարցերով ղեկավար Վալերի Ամոսը, փոխանցում է Agence France-Presse-ը։

Ամոսը մտահոգություն է հայտնել Սիրիայի իշխանությունների կողմից տանկերի, հրետանու և ծանր զինամթերքի կիրառման կապակցությամբ։ Ըստ նրա, բնակիչների մեծ մասը կցանկանար լքել մարտերի գոտին, սակայն չունի այդ հնարավորությունը։ Մինչդեռ Հալեպում չի հերիքում խմելու ջուրը, ուտելիքը, ներքնակները, վերմակները և հիգիենայի պարագաները։

Մինչդեռ ականատեսները պնդում են, որ կոտրել ապստամբների դիմադրությունը կառավարական զորքերին առայժմ չի հաջողվում։ Սիրիայի կառավարությունը Հալեպի համար մղվող պայքարը որակել է որպես քաղաքացիական պատերազմի վերջնական փուլ, այն ժամանակ, երբ ապստամբների հրամանատարությունը խոստանում է քաղաքը վերածել գերեզմանոցի Սիրիայի բանակի համար։ Իր հերթին ԱՄՆ-ի պաշտպանության նախարար Լեոն Պանետան մերձարևելյան շրջագայության ընթացքում նշել է, որ Հալեպում մղվող մարտերը կդառնան «մեխ Սիրիայի նախագահ Բաշար ալ-Ասադի դագաղի համար»։