Համատեղ պայքար՝ մշակութային արժեքների ապօրինի արտահանման դեմ

Նոյեմբերի 21-23-ը Վիեննայում անցկացվել է Միացյալ Ազգերի Կազմակերպության թմրամիջոցների և հանցագործության դեմ պայքարի գրասենյակի (UNODC) կողմից կազմակերպված մշակութային արժեքների պահպանության, ապօրինի արտահանման դեմ պայքարի վերաբերյալ՝ իրենց կազմած նախագծի քննարկում (մասնագետների խմբի ոչ պաշտոնական հանդիպում), որին մասնակցել է նաև ՀՀ մշակույթի նախարարության աշխատակազմի մշակութային ժառանգության և ժողովրդական արհեստների վարչության պետ Արմենակ Սարգսյանը:

Նախագծի քննարկումներին մասնակցել են 16 պետությունների, UNESCO-ի, UNODC -ի, UNIDRO- ի, INTERPOL-ի ներկայացուցիչներ:

Քննարկվող նախագիծը կազմվել է ՄԱԿ-ի և Եվրոպայի Խորհրդի մի շարք համաձայնագրերի, ընդունված կոնվենցիաների, UNESCO- ի և UNODC-ի հաշվետվությունների ու առաջարկությունների հիման վրա` հիմնական դրույթներ նախանշելով

• մշակութային արժեքների պահպանության, ապօրինի արտահանման դեմ պայքարի ու կանխարգելման ռազմավարության մշակումը,

• տեղեկատվության հավաքագրումը, պետությունների և միջազգային կազմակերպությունների կողմից անհրաժեշտ տվյալների (գողացված կամ բացակայող իրերի վերաբերյալ) բազայի ստեղծումը,

• ապօրինի ձեռքբերված մշակութային արժեքների տեղափոխման կանխումը,

• պետության կողմից կենտրոնացված ղեկավարումը,

• մշակութային հաստատությունների և կազմակերպությունների աշխատանքների կանոնակարգման նպատակով պետության կողմից կարգերի մշակումը,

• պետության կողմից դիտանցումը և մշակութային արժեքների շուկան և ինտերնետի վերահսկումը,

• հասարակության կրթությունը և տեղեկացվածությունը,

• միջազգային քրեական օրենսդրության կիրառումը,

• ապօրինի արտահանված մշակութային արժեքի առգրավումը,

• մշակութային ժառանգության պահպանությունը, հնագիտական վայրերում գանձախուզության դեմ պայքարի նպատակով քրեական օրենսգրքում հոդվածների նախատեսումը,

• քրեական գործերում միջազգային իրավական համագործակցությունը և այլն:

Քննարկումների արդյունքում մշակվել է մշակութային արժեքների պահպանության, ապօրինի արտահանման դեմ պայքարի կառավարման սկզբունքների նախագիծ: