Ի՞նչ է մտածել Բադասյանը. նոր կառույցը՝ սորոսականների կուռացիայի տա՞կ

Արդարադատության նախարար Ռուստամ Բադասյանը այսօր հայտարարել է, որ հակակոռուպցիոն պայքարն ինստիտուցիոնալ մակարդակի վրա դնելու համար կարևորում է բիզնեսի մասնակցությունը հակակոռուպցիոն քաղաքականության մշակման և այդ ոլորտում միջոցառումների իրականացման գործընթացում: Որպես այդ քաղաքականության առաջին տարր՝ արդարադատության նախարարն ընդգծել է հոկտեմբերին Կոռուպցիայի կանխարգելման հանձնաժողովի ստեղծումն ու դրա արդյունավետ գործունեությունը:

Հանձնաժողովն ունենալու է պաշտոնատար անձանց կողմից ներկայացվող հայտարարագրերի ստացման, վերլուծության գործառույթներ, ինչպես նաև հակակոռուպցիոն կրթության ոլորտում հստակ լիազորություններ, որի դերը, Ռուստամ Բադասյանի խոսքով, չի կարելի թերագնահատել:

Հաջորդ կարևոր քայլը նախարարը համարել է ինստիտուցիոնալ համակարգում հակակոռուպցիոն իրավապահ մարմնի ստեղծումն ու կոռուպցիոն բնույթի հանցագործությունների քննությունը մասնագիտացված հակակոռուպցիոն մարմնին վստահելը: Բադասյանը նաև խոսել է հակակոռուպցիոն դատարանի ձևավորման անհրաժեշտության մասին: Արդեն իսկ հասկանալի է, որ այս լայն լիազորություններ ունեցող կառույցը գտնվելու է հենց Բադասյանի ու իր թիմի, ասել է թե, սորոսականների կուռացիայի տակ, քանի որ հենց այս թիմն է մշակել արդարադատությունը իրենցով անելու ծրագիրը: Պարզ է, որ կառույցը ունենալու է այնքան լիազորություններ, որոնք բավարար կլինեն հատկապես մասնավոր բիզնեսի հանդեպ ոչ իրավաչափ քայլեր գործադրելու համար:

Իսկ ավելի հստակ՝ այն դառնալու է յուրահատուկ պատժիչ գործիք, իսկ հակակոռուպցիոն դատարանը՝ յուրահատուկ տրիբունալ: Թերևս հենց սա էր սորոսականների ձգտումը, երբ ամեն գնով փորձում էին ոլորտում տեղավորել յուրայինների, այլ հարց է, որ փաստացի այս քայլին հավանություն է տալիս վարչապետ Նիկոլ Փաշինյանը, ով վերջին շրջանում, կարծես, ցանկանում էր նվազեցնել կախվածությունը արտաքին շարժումներից ու ցանցերից: