Համոզված եմ, որ մինչ 2015 թվականը ՀՅԴ-ն կձերբազատվի «մոլախոտերից». Վիտալի Բալասանյան (տեսանյութ)

Lurer.com-ը Արցախում հանդիպել է ԼՂՀ նախագահի նախկին թեկնածու Վիտալի Բալասանյանի հետ, ով խոսել է նոր քաղաքական ուժ ստեղծելու մասին։ Ըստ նրա՝ աջակցությունը լինելու է առաջին հերթին ժողովրդի կողմից։

«Նախ ուզում եմ ասել, որ նախաձեռնողական խումբը, այն է՝ մեր շտաբը, շուտով հանդես է գալու հայտարարությամբ քաղաքակական ուժի ստեղծման վերաբերյալ։ Ըստ իս, առաջին անգամ Արցախում դիտվեց մի գործընթաց, երբ դրսից ֆինանսական կամ այլ աջակցություն չվայելելով,  ես կարողացա դնել իմ թեկնածությունը։ Հիմք ընդունելով ընտրողների կամքը՝ հաշվի առնելով նաև այն, որ իմ՝ Արցախում պատահական անձ չլինելը ու ակնկալելով ժողովրդի աջակցությունը՝ դրեցի թեկնածությունս։ Այժմ էլ նորից ակնկալելով ժողովրդի աջակցությունը՝ դիմում եմ քաղաքակական կուսակցություն հիմնելու քայլին։

Սա ժողովրդի պահանջն է, քանի որ քարոզարշավի ընթացքում զգացի քաղաքական նոր ուժի պահանջը, այդ իսկ պատճառով անկախ նրանից՝ կընտրվեի որպես նախագահ, թե ոչ, մտադրված էի անպայման ստեղծել քաղաքական կուսակցություն, որը կհիմնվի ազգային գաղափարախոսության վրա, կանդրադառնա սոցիալական խնդիրների լուծմանն ու ակտիվորեն կմասնակցի նաև գալիք խորհրդարանական ընտրություններին։

Ղարաբաղյան հատվածում մենք անելինքեր ունենք, քանի որ մեզ պարտադրված պատերազմի արդյունքում ձեռք բերած հաղթանակը դեռ ամրագրված չէ։ Այդ խնդիրը վերաբերում է համայն հայությանը, քանի որ հաղթանակն էլ է պատկանում համայն հայությանը։ Կոչ կանեի բոլոր նրանց, ովքեր սկսել են այս սրբազան գործը, ավարտին հասցնե այն, ինչու չէ, ղարաբաղյան հատվածում առաջ տանել Հայ դատի մի մասը կազմող Ցեղասպանության ճանաչումը և դա էլ ավարտին հասցնել: Կրկին կոչ եմ անում մասնավորապես այն մարդկանց, ովքեր պատերազմական գործողություններում եղել են մեր կողքին, այն ժամանակ, երբ մենք բոլորս միաբան էինք, որի շնորհիվ պատերազմը պսակեցինք հաղթանակով, աջակցել մեզ։ Շատ կցանկանայի տեսնել իրենց մեր շարքերում»,- ասել է նա։

Անդրադառնալով ՀՅԴ-ի հետ կապված վերջին հակասական լուրերին, թե Արցախի ԿԿ-ն փոխել է որոշումը և հանդես եկել Բակո Սահակյանին սատարելու հայտարարությամբ, հաշվի չառնելով շարքային դաշնակցականների կարծիքները ու հետագա խորհրդարանական ընտրություններում ՀՅԴ կողմից հնարավոր աջակցմանը՝ Վիտալի Բալասանյանն ասել է.

«Ես եղել եմ ԼՂՀ ԱԺ ՀՅԴ խմբակցության անդամ, սակայն կուսակցության որոշումով ինձ դուրս են մղել խմբակցությունից։ Այժմ ես միակ անկախ պատգամավորն են, ով որևէ խմբակցության անդամ չէ։ Ժամանակը ցույց կտա՝ արդյոք իմ գաղափարակիցները կհայտնվե՞ն իմ կողքին, թե՞ ոչ։

Դաշնակցության որոշ անդամներ ժամանակ առ ժամանակ գործարքների մեջ են մտնում (որը, ի դեպ, Դաշնակցության համար չարաբաստիկ քայլ է)՝ կորցնելով Հայաստանում քաղաքական որևէ դերակատարություն։ Նույնը կատարվեց նաև Արցախում, չար նախանձից էր, որ ՀՀ-ում ՀՅԴ-ն պարտվեց, սակայն արցախցի շարքային դաշնակցականների մեծ մասը հայտնվեց իմ կողքին և քվեարկեց իմ օգտին, որի համար շնորհակալ եմ։

Ես կողմնակից եմ Դաշնակցության ինքնամաքրմանը։ ՀՅԴ-ն մեծ դերակատարություն ունի Հայաստանի և Արցախի ինքանապաշտպանության հարցում, այդ իսկ պատճառով ուզում եմ տեսնել այն Դաշնակցությունը, որի մասին երազում ենք մենք բոլորս։ Վստահ եմ, որ մինչ 2015 թվականի խորհրդարանական ընտրությունները Դաշնակցությունը կձերբազատվի «մոլախոտերից» և կաջակցի ինձ, իսկ ժամանակը կապացուցի, որ այդ մարդիկ սխալ են վարվել։ Դաշնակցությունը, լինելով ազգային գաղափարախոսության կրողն ու Հայ դատի առաջամարտիկը, սատարեց մի մարդու, ով արտաքին քաղաքականության խնդիրներով գրեթե չի զբաղվում»։ 

 Լիլիթ Լալայան