Առողջապահության նախարարն ացելել է Արագածոտնի մարզ

ՀՀ առողջապահության նախարար Դերենիկ Դումանյանը հուլիսի 27-ին աշխատանքային այցով Արագածոտնի մարզում էր` տեղում բժշկական ծառայությունների կազմակերպման իրավիճակին և առկա խնդիրներին ծանոթանալու նպատակով:

ՀՀ Արագածոտնի մարզում գործում է 22 բժշկական կազմակերպություն, որոնցից 5-ը մարզպետարանի ենթակայությամբ, 17-ը՝ համայնքային։ Հիվանդանոցային բուժօգնությունն իրականացվում է 4 բժշկական և 2 առողջության կենտրոններում։

Նախարարը՝ մարզպետ Սարգիս Սահակյանի ուղեկցությամբ, այցը սկսել է Ծաղկահովիտ համայնքից: Շուրջ 15 հազար բնակչություն սպասարկող բժշկական կենտրոնում Դերենիկ Դումանյանը ծանոթացել է ծննդատան, շտապ օգնության կայանի, մանկական և մյուս բաժանմունքների աշխատանքների կազմակերպմանը և առկա հիմնախնդիրներին: Բժշկական կենտրոնի աշխատակիցների հետ հանդիպման ընթացքում բարձրացվել են շենքային ոչ բարվոք պայմաններին, սարքավորումների, ինչպես նաև մասնագետների պակասին վերաբերող հարցեր: Նախարարը խոստացել է աջակցել նշված խնդիրների լուծմանը, միաժամանակ առաջարկելով մարզպետին' քննարկել բժշկական կենտրոնի զարգացման հնարավորությունները, ինչպես նաև մարզ ուղեգրված մասնագետներին ծառայողական բնակարաններով ապահովելու հարցը:

Այնուհետև Դերենիկ Դումանյանն այցելել է «Ապարանի բժշկական կենտրոն», որը 2011թվականին վերաբացվել է լիովին հիմնանորոգված: Կենտրոնի տնօրենը տեղեկացրել է, որ տեղի բնակչությանը շուտով ակնաբուժական բարձրորակ ծառայություն կմատուցվի։ Այդ նպատակով ձեռք են բերվել աչքի վիրահատությունների համար անհրաժեշտ ժամանակակից սարքավորումներ, իսկ մասնագետն ուղարկվել է վերապատրաստման: Կարևորելով մարզերում ակնաբուժական ծառայությունների զարգացումը, Դերենիկ Դումանյանը նախարարության աշխատակազմի ներկայացուցիչներին հանձնարարել է ուսումնասիրել մարզերում աչքի հիվանդությունների բուժման իրականացման հետ կապված հիմնախնդիրները և ըստ դրա ծառայության զարգացման ուղղությամբ առաջարկություններ ներկայացնել: Աշտարակում նախարարը ծանոթացել է բժշկական կենտրոնի և տարածաշրջանի առողջապահական խնդիրներին: Շուրջ 63 հազար բնակչություն սպասարկող կենտրոնը ստեղծվել է «Աշտարակի հիվանդանոց», «Աշտարակի պոլիկլինիկա» և «Աշտարակի մարզային շտապ բժշկական օգնության կայան» փակ բաժնետիրական ընկերությունների միավորմամբ: Այստեղ մասնակի վերանորոգման աշխատանքներ են իրականացվել պետական բյուջեի միջոցների հաշվին: Այցի ընթացքում քննարկվել են ծնունդների նվազման (ծննդկանների արտահոսքով պայմանավորված) և կազմակերպական այլ հարցեր:

Դերենիկ Դումանյանն այցելել է նաև Կոշ գյուղի «Արմենակ և Աննա Թադէոսյանների անվան բուժա¬րան», որը բարերարների ֆինանսական աջակցությամբ 2012թ.-ին շահագործման է հանձնվել ժամանակակից չափորոշիչներին համապատասխան: Տեղում քննարկվել է թերծանրաբեռնվածությամբ գործող կենտրոնի աշխատանքների կազմակերպման բարելավման հարցը: Նախարարը պատրաստակամություն է հայտնել սույն խնդիրը քննարկել նաև կենտրոնը կառուցած բարերարների հետ:

Այցի ավարտին նախարարը եղել է Թալինի բժշկական կենտրոնում։ Կենտրոնի աշխատակիցների կողմից որպես հրատապ լուծման խնդիր է ներկայացվել բուժսարքավորումների պակասը: Դերենիկ Դումանյանը նախարարության աշխատակազմի ներկայացուցիչներին հանձնարարել է խնդրի լուծման կոնկրետ առաջարկություններ ներկայացնել: Նախարարը նշել է, որ ծննդօգնության պետական հավաստագրի ներդրման արդյունքում մարզային բուժհաստատություններից ծնունդների որոշակի արտահոսք է գրանցվել դեպի Երևան' նվազեցնելով մարզում գրանցված ծնունդների թիվը և ծանրաբեռնելով մայրաքաղաքի բուժհաստատությունները: Նա տեղեկացրել է, որ աշխատանքներ են իրականացվում խնդրի կանոնակարգման ուղղությամբ: Առողջապահական որակյալ ծառայությունների տրամադրման գործում նախարարը կարևորել է նաև մարզային ճանապարհների բարեկարգման դերը:

Այցի ընթացքում տեղերում քննարկվել են մարզում բժշկական ծառայությունների մատուցմանն առնչվող ընթացիկ այլ հարցեր, նախարարը զրուցել է բժշկական կենտրոններում բուժվող հիվանդների հետ: