«ՉԻ». Հափշտակած 12 միլիոն ԱՄՆ դոլարը տնօրինել են ՀՀ բարձրաստիճան պաշտոնյաները

«Չորրորդ ինքնիշխանությունը» գրում է. «Վերջին շրջանում սովորական է դարձել մարդկանց «քցելը»: Այս գործելակերպը ոչ միայն հաջող «ատկատի» դեպքում հովանավորվում է ՀՀ բարձրագույն իշխանության կողմից, այլեւ շատ դեպքերում «քցելու» նախաձեռնողները հենց բարձրաստիճան պաշտոնյաներն են լինում: Ընդ որում` մեր պետության պարագլուխները նախընտրում են «քցել» մեծ գումարներ, իսկ այդպիսի գումարներ, ինչպես հայտնի է, Հայաստանում փորձում են ներդնել հիմնականում օտարերկրացիները:

Օտարերկրյա ներդրումների համար Հայաստանը գրավիչ դարձնելու ՀՀ իշխանության եւ մասնավորապես ՀՀ վարչապետ Տիգրան Սարգսյանի կոչերին զուգահեռ, մամուլն ամեն օր անդրադառնում է հերթական «քցվածի» պատմությանը: Փորձը ցույց է տալիս, որ եթե «քցվողը» իր մտածողությամբ «գողական» չէ, եւ դեռեւս սերտաճած չէ ՀՀ կրիմինալ վարչակարգի հետ, միամիտի պես նախընտրում է գնալ դատարան եւ փորձել այնտեղ հասնել արդարադատության: Հենց առաջին դատական նիստերից (եթե, իհարկե, գործ է հարուցվում եւ այն հասնում է դատարան) հետո խոր հիասթափություն է առաջանում օտարերկրյա ներդրողների մեջ, եւ նրանք շատ արագ հասկանում են, որ գործ ունեն ոչ թե պետության եւ պետական համակարգի, այլ մի խումբ թալանչիների հետ, որոնց միավորել է ավազակապետության խաղի կանոններն ու շահը՝ անձնական շահը:

«ՉԻ»-ն, եւ ոչ միայն «ՉԻ»-ն, այլեւ հայկական մամուլն առհասարակ, անդրադարձել է բազմաթիվ այսպիսի պատմությունների: Մի դեպքում շոշափվել է ՀՀ արդարադատության նախկին նախարար, այժմ ՀՀԿ պատգամավոր Դավիթ Հարությունյանի, մեկ այլ դեպքում՝ Սերժ Սարգսյանի եղբոր՝ Լեւոն Սարգսյանի, երրորդ դեպքում՝ ՀՀ վարչապետ Տիգրան Սարգսյանի անունները:

Օրերս «ՉԻ»-ն հերթական նամակն է ստացել Ռուսաստանի Դաշնության «Ռենովա» ընկերության տնօրեն Գեորգի Իոսիֆյանից, որը միաժամանակ նամակ է հղել նաեւ Սերժ Սարգսյանին եւ ՀՀ գլխավոր դատախազ Աղվան Հովսեփյանին՝ նրանց տեղեկացնելով, որ Հայաստանում իրեն «քցել» են 12 միլիոն ԱՄՆ դոլար: Նամակում Իոսիֆյանը գրել է. «2008 թվականի տարեվերջում իմ մասնակցությամբ Հայաստանում գրանցվել է «Սար Կապիտալ» կոլլեկտորային ընկերությունը, որի ակտիվները կազմել են 16.000.000 (տասնվեց միլիոն) ԱՄՆ դոլար:

2009թ. մայիս ամսին ՀՀ քաղաքացի Մհեր Ավետիսյանը (վերջինս Արարատյան թեմի առաջնորդ Նավասարդ արքեպիսկոպոս Կճոյանի սանիկն է, հիմա համարվում է Խանջյան փողոցում գործող «Jose» ռեստորանային համալիրի սեփականատերը - ՉԻ) համաձայնության գալով Ղազախստանի Հանրապետության քաղաքացի Մարատ Ելտայեվի եւ «ԲՏԱ բանկ Երեւան»-ի նախագահ Նուռ Բագբերգենովի հետ, անօրինական ճանապարհով` մասնավորապես համապատասխան փաստաթղթերի բացակայության պայմաններում, ոմն Լեւոն Խաչատրյանին պետռեգիստրում գրանցել են որպես ընկերության նոր տնօրեն: Ըստ էության, թերի միջնակարգ կրթությամբ Խաչատրյանը պետք է տնօրիներ ակտիվներ, որոնց գրավային արժեքը կազմել է 29.000.000 (քսանինը միլիոն) ԱՄՆ դոլար: Ընդամենը երկու ամսվա ընթացքում վերոհիշյալ անձինք տարբեր խարդախ սխեմաների միջոցով ընկերությունից հանել են բոլոր ակտիվները:

2009թ. հուլիս ամսին, ժամանելով Երեւան, դիմել եմ ՀՀ Գլխավոր դատախազություն` 12.000.000 (տասներկու միլիոն) ԱՄՆ դոլարի հափշտակության առթիվ: Իմ դիմումի հիման վրա հարուցվել է քրեական գործ, որի քննությունը կատարվել է ՀՀ Ազգային Անվտանգության Ծառայության քննչական վարչությունում:

Քրեական գործի շրջանակներում կալանավորվել է Լեւոն Խաչատրյանը: 2010 թվականին գործից Լեւոն Խաչատրյանի վերաբերյալ մաս է առանձնացվել եւ քննվել առանձին վարույթով, այնուհետեւ այն ուղարկվել է դատարան: Դատաքննության արդյունքում 2010 թվականի օգոստոսին Լեւոն Խաչատրյանը դատապարտվել է 6 տարվա ազատազրկման` պաշտոնական դիրքի չարաշահման եւ հարկերից չարամտորեն խուսափելու համար:

Իմ ներկայացուցչի հետ մասնավոր զրույցի ընթացքում ՀՀ Ազգային Անվտանգության Ծառայության քննչական վարչության պետ Մ. Մարուքյանը ամենայն մանրամասնությամբ պատմել է, թե ովքեր են իրական կազմակերպիչները, ովքեր կան կանգնած նրանց թիկունքում, ովքեր են պարտատերերի հետ պայմանավորվել գրավի ազատման դիմաց վճարելիք գումարի մասին, Լեւոն Խաչատրյանին` լռության դիմաց առաջարկված գումարի չափի մասին եւ այլն: Թեեւ պարոն Մարուքյանը վստահեցրել է, որ գործը դեռեւս փակված չէ, այնուամենայնիվ, արդեն մեկ տարի անցել է Լեւոն Խաչատրյանի դատապարտման օրից, սակայն առ այսօր որեւէ տեղաշարժ չկա: Արդյունքում, իմ կորցրած 12 միլիոն ԱՄՆ դոլարի հարցը այդպես էլ մնում է չլուծված:

Ավելորդ չի լինի նշել, որ Լ. Խաչատրյանի դատաքննության մի քանի նիստերի անձամբ ներկա եմ եղել, եւ պետք է ասեմ, որ տեսածս բառիս բուն իմաստով ծաղր էր արդարադատության նկատմամբ:

Հաշվի առնելով վերը նշված փաստերը, խնդրում եմ Ձեզ հանձնարարություն տալ ստուգել քրեական գործի նյութերը, պարզել իրական կազմակերպիչներին եւ համարժեք գնահատական տալ կատարված հանցագործությանը: Անհրաժեշտության դեպքում կարող եմ գրավոր տրամադրել մանրամասն տեղեկատվություն կատարված հանցագործության վերաբերյալ:

Ապավինում եմ Ձեր կողմից համապատասխան արդյունավետ միջամտությանը, այլապես ինձ այլ բան չի մնում, քան դիմել տեղական եւ միջազգային մամուլին, որպեսզի իմ օրինակով մարդիկ իրազեկվեն, թե ինչպես են Հայաստանում վերաբերվում ներդրողներին, եւ որքան անպաշտպան կարող է լինել խոշոր ներդրում կատարողը նման մթնոլորտում»,- գրել է Գեորգի Իոսիֆյանը Սերժ Սարգսյանին եւ Աղվան Հովսեփյանին ուղղված նամակում:

«ՉԻ»-ն հրապարակման նախաբանում առայժմ նշել է միայն Մհեր Ավետիսյանի անունը, որը, ինչպես նշել ենք, Արարատյան թեմի առաջնորդ Նավասարդ արքեպիսկոպոս Կճոյանի սանիկն է: Թե ովքեր են նրան սատարել, ինչպես է գործը փակվել, եւ ինչ առնչություն ունի այս պատմության հետ ՀՀ վարչապետ Տիգրան Սարգսյանը` «ՉԻ»-ն կներկայացնի հաջորդիվ: Նշենք միայն, որ մեքենայության այս շղթայում ռուսաստանցի ներդրողը տալիս է որոշ մարզպետների անուններ եւս:

Շարունակելի...»: