Դատարանը մերժեց Մարգարիտա Խաչատրյանի հայցն՝ ընդդեմ «Հրապարակ» օրաթերթի

Երեւանի Կենտրոն եւ Նորք Մարաշ ընդհանուր իրավասության դատարանն այսօր՝ հուլիսի 30-ին, մերժել է «Զինվոր» հասարակական կազմակերպությունների համագործակցության իրավապաշտպան համակարգող խորհրդի նախագահ Մարգարիտա Խաչատրյանի հայցն՝ ընդդեմ «Հրապարակ» օրաթերթի: Այս մասին NEWS.am-ի թղթակցի հետ զրույցում ասաց «Հրապարակ» օրաթերթի գլխավոր խմբագիր Արմինե Օհանյանը: Նրա խոսքով՝ Մարգարիտա Խաչատրյանը հայց էր ներկայացրել թերթի դեմ, որ իր դեմ քրեական գործ չհարուցվեր, քանի որ «Հրապարակում» լուրի հրապարակումից հետո ՀԿ-ի ղեկավարը եկել էր խմբագրություն, փշրել էր, վնասվածքներ էր պատճառել աշխատակիցներին եւ այդ դեբոշից հետո ենթադրվում էր, որ նրա դեմ պետք է քրեական գործ հարուցվի: «Քանի որ քրեական գործ չհարուցվեց եւ իրեն չպատժեցին, ենթադրում եմ, որ իշխանությունը որոշեց, որ պետք է պահպանի պարիտետը եւ քաղգործով էլ մեր դեմ վճիռ չպետք է կայացվի»,- ասաց նա: Գլխավոր խմբագրի խոսքով՝ Մարգարիտա Խաչատրյանը որոշեց դիմել դատարան քաղաքացիական հայցով, որպեսզի իրենք հրաժարվեն քրեական գործ հարուցելու իրենց պահանջից:

Արմինե Օհանյանը կարծում է, որ իրենք լրագրողական բարեխիղճ գործունեություն են արել, ստացել էին ինֆորմացիա եւ զանգել ճշտել դրա իսկությունը, ու Մարգարիտա Խաչատրյանի մեկնաբանությունը եւս տեղադրել լուրի մեջ: Սկզբից Մարգարիտա Խաչատրյանը «Հրապարակից» պահանջում էր 2մլն 40 հազար դրամ՝ իր պատիվն ու արժանապատվությունը ոտնահարելու, իր տղայի անունը շահարկելու համար, այնուհետեւ հրաժարվեց այդ պահանջից, մնաց հերքման պահանջը, բայց այժմ թերթը նույնիսկ հերքում տպագրելու պատճառ չունի:

Իսկ Մարգարիտա Խաչատրյանը NEWS.am-ի թղթակցի հետ զրույցում նշեց, որ դատարանի որոշումը բողոքարկելու է Վերաքննիչում: Նա դժգոհ է դատարանի որոշումից՝ շեշտելով, որ դա միակողմանի որոշում էր:

Նշենք, որ «Հրապարակ» օրաթերթում տպագրված մի նյութի պատճառով Մարգարիտա Խաչատրյանը, «Հրապարակի» փոխանցմամբ, ներխուժել էր թերթի խմբագրություն, ծեծկռտուք էր սարքել, կոտրել էր բաժակներն ու մարմնական վնասվածք հասցրել խմբագիր Արմինե Օհանյանին: Լրագրողները ահազանգել էին ոստիկանություն, որը տեղ էր հասել բավականին ուշացումով: Թերթի խմբագիրը ոստիկանությունում ցուցմունք էր տվել տեղի ունեցածի առթիվ: Ավելի վաղ էլ Մարգարիտա Խաչատրյանը NEWS.am-ի թղթակցի հետ զրույցում ասել էր.«Ես վիրավորանք կուլ չեմ տա, «Հրապարակ» օրաթերթի խմբագրությունում ինձ վիրավորել են, ես էլ նրանց եմ վիրավորել, քաշքշուկ էլ է եղել, չեմ հրաժարվում, որ նման բան եղել է, ու քաշքշելու եմ: Իմ զոհված մինուճար տղայի անունը տա՞, ասի տղայիդ արյունը ծախո՞ւմ ես»,-ասել էր նա:

Աղբյուրը՝ news.am