Տրիկոտաժի ոլորտում իրականացվող ներդրումային ծրագրի ծավալները կկրկնապատկվեն

Կառավարությունը ներդրումային ծրագրի շրջանակում «ՍԱԹԵՆԿԱՐ» ՍՊԸ-ին տրամադրված հարկային արտոնության մեջ (ԱԱՀ հարկը 3 տարով հետաձգելու մասին) փոփոխություն կատարեց ու ևս մեկ տարով երկարաձգեց արտոնության ժամկետը (մինչեւ 2021 թվականի օգոստոսի 20-ը): Էկոնոմիկայի նախարար Տիգրան Խաչատրյանը նշեց, որ ժամկետի երկարաձգումը պայմանավորված է հավելվածով հաստատված ցանկում նոր հումքատեսակների ավելացմամբ, որոնք նախատեսվում է  ներմուծվել երկու տարվա ընթացքում:

«Կազմակերպությունը գործում է 2002 թվականից, զբաղվում է տրիկոտաժի արտադրությամբ Արագածոտնի մարզում: Անցյալ որոշմամբ եղել է 286,5 մլն դրամ ընդհանուր արժեքով ապրանքներ ներկրելու համար ավելացված արժեքի հարկի հետաձգում 3 տարի ժամկետով: Այս լրացմամբ առաջարկվում է ևս 300 մլն դրամ արժեքով ապրանքների ներմուծման համար ԱԱՀ-ն հետաձգել: Կազմակերպությունը նշեց, որ կստեղծի 14 նոր աշխատատեղ»,- ասաց Տիգրան Խաչատրյանը:

Վարչապետ Նիկոլ Փաշինյանը նկատեց, որ ընկերության կողմից ներդրումների ծավալներն ավելի քան 2 անգամ կկրկնապատկվեն: