«Ժողովուրդ». Աբովյանի քաղաքապետն աներոջը՝ Գագիկ Ծառուկյանին, չի կարողանում համոզել, որ թույլատրի կրկին առաջադրվել նույն պաշտոնում

Ըստ «Ժողովուրդ»-ի տեղեկությունների՝ Աբովյանի քաղաքապետ Կարո Գուլոյանը աներոջը՝ Գագիկ Ծառուկյանին այդպես էլ չի կարողանում համոզել, որպեսզի նա թույլատրի կրկին առաջադրվել Աբովյանի քաղաքապետի պաշտոնում: Տեղեկություններ կան, որ քաղաքապետը Ծառուկյանին հանդիպել է Լոնդոն մեկնելուց առաջ՝ մտածելով, որ տրամադրությունը բարձր կլինի, և գուցե մտադրությունը փոխած լինի: Սակայն Ծւսռուկյանն իր փեսային ասել է, թե ժողովուրդը դժգոհ է նրա աշխատանքից, ավելին, Գուլոյանը հեղինակազրկում է ԲՀԿ առաջնորդին:

Երեկ «Ժողովուրդ»-ը փորձել է Կարո Գուլոյանից ճշտել տեղեկությունը, սակայն վերջինիս հեռախոսն անհասանելի է եղել: Թերթը հավելում է, որ քաղաքապետ դառնալուց հետո Ծառուկյանի փեսան երկու նոր ռեստորանի տեր է դարձել՝ «Ղարս» և «Փարվանա», ինչպես նաև ձկնաբուծարան է գնել, սեփականաշնորհել Աբովյանի հանրախանութը՝ տեր դառնալով նաև գազալցակայանների Եղվարդում և Արգավանդում: