ԵՄ-ն աջակցում է Հայաստանում բարեփոխումներին. Անդրեա Վիկտորին

Կրթություն, զբաղվածություն, տեղեկատվական տեխնոլոգիաներ, նորարարություն, գիտական ներուժի զարգացում և այլն. ԵՄ-ն տարբեր ծրագրերի շրջանակում ակտիվորեն աջակցություն է ցուցաբերում՝ խրախուսելով նոր գաղափարներն ու մոտեցումները: Երևանում հոկտեմբերի 4-ին «EU Neighbours East» նախագիծը նախաձեռնել էր հանդիպում՝ ներկայացնելու նորարարությունների և երիտասարդության ոլորտներում ԵՄ աջակցության ծրագրերը:  Հայաստանում տարբեր դրամաշնորհներով օժանդակությունը հասանելի է «Հորիզոն-2020», «EU4Youth», «EU4Bussines», «Քաղաքապետները հանուն տնտեսական զարգացման» ծրագրերի շրջանակներում:

Միջոցառման հատուկ հյուրը՝ Հայաստանում ԵՄ նոր դեսպան Անդրեա Վիկտորինը, իր ելույթում նշեց, որ շահագրգռված են Հայաստանում գործունեություն ծավալելու հարցում: Դրա հիմքում ընկած է այն, որ ցանկանում են բարելավել Հայաստանի քաղաքացիների կյանքը, հետևաբար աջակցում են երկրում տեղի ունեցող բարեփոխումներին:

«Շատ ուրախ եմ, որ այս միջոցառմամբ հնարավորություն է ստեղծվել ցույց տալու, թե մենք ինչով ենք զբաղված ձեր երկրում: Մենք աջակցում ենք Հայաստանի զարգացմանը տարբեր բնագավառներում: Զարգացման գործում ինչպես անհրաժեշտ է ՀՀ կառավարության աջակցությունը, այնպես էլ քաղաքացիական հասարակության մասնակցությունը»,- ասաց դեսպանը: Նրա խոսքով՝ շատ կարևոր է Հայաստանում ձեռներեցությունը, նորարարությունը, կրթությունը, գիտությունը, թվայնացումը զարգացնելը, և դա՝ ոչ միայն Երևանում, այլև մյուս մարզերում:

«Մենք այստեղ ենք, որպեսզի աջակցենք փոքր և միջին ձեռնարկություններին: Հավատացեք ինձ, ցանկացած հաջող տնտեսության հիմքում ընկած է փոքր և միջին բիզնեսը: Դա նշանակում է, որ մենք օգնում ենք երիտասարդներին, ովքեր հանդես են գալիս նոր գաղափարներով»,-ասաց նա: Նրա խոսքով՝ կրթությունը հասարակությունում փոփոխությունների սկզբնաղբյուրն է, և հենց այդ ուղղությամբ պետք է շատ աշխատանք տանել: ԵՄ-ն ցանկություն ունի աջակցել Հայաստանում բարձրագույն կրթության զարգացմանն ու բարեփոխմանը: Նա տեղեկացրեց, որ երեկ Կրթության, գիտության մշակույթի և սպորտի նախարարության հետ քննարկել են այդ հարցերը: Դեսպանն ընդգծեց, որ պետք է նաև հնարավորություն տալ տաղանդավոր երիտասարդներին ինքնադրսևորվել, հանդես գալ սեփական գաղափարներով, նորարարական մոտեցումներով և առաջ տանել դրանք:

«Առկա է  համագործակցության ծրագիր Երևանի պետական բժշկական համալսարանի, Ֆիզիկայի ինստիտուտի հետ և այլն: Մենք փնտրում ենք նոր դիմումներ, նոր նախաձեռնություններ: Մենք շատ մեծ կարևորություն ենք տալիս երիտասարդների հետ աշխատանքին: Դուք երիտասարդ եք, դուք ունեք հնարավորություն, մտքեր, գաղափարներ և մենք պատրաստ ենք լսել ձեզ»,-ասաց նա՝ ընդգծելով, որ աջակցում են ժողովրդավարությանը, մարդու իրավունքների պաշտպանությանը, օրենքի գերակայությանը:

Հանդիպմանը ներկա էին ԵՄ ծրագրերի կողմից արդեն իսկ դրամաշնորհներ ստացած մասնակիցներ, Եվրոպական հանձնաժողովի Հարևանության և ընդլայնման բանակցությունների գլխավոր տնօրինության (EEAS, DG NEAR) և Հայաստանում ԵՄ պատվիրակության ներկայացուցիչներ:

Ամալյա Նավասարդյանը, ով ներկայացնում է Սևանի բազմագործառութային քոլեջը, լրագրողների հետ զրույցում նշեց, որ «Սեյվ դը չիլդրեն» կազմակերպության հետ համագործակցության շրջանակում բարելավել են իրենց կրթական մոդուլային ծրագիրը:

«Արդյունքում դասավանդումը դարձրել ենք առավել արդյունավետ: ԵՄ-ի աջակցությամբ ստացել ենք նյութատեխնիկական բազա, համակարգիչներ, տեխնիկա, որպեսզի մեր պրակտիկ դասերն առավել արդյունավետ դարձնենք: «Սեյվ դը չիլդրեն»-ի մասնագետների հետ աշխատել ենք կրթական ծրագիրը բարելավելու ուղղությամբ: Մեր մասնագետները վերապատրաստվել են, սովորել են պրակտիկ դասընթացները կազմակերպելու նոր մոտեցումներ»,-ասաց Ամալյա Նավասարդյանը:

 ԵՊՀ ժուռնալիստիկայի ֆակուլտետի ուսանողուհի Անի Ավետիսյանը ևս ԵՄ աջակցություն է ստացել: Նրա գաղափարներն ուղղված էին գյուղական համայնքում երիտասարդների մասնակցությամբ ճամբարի կազմակերպմանը՝ հիմքում դնելով նոր հմտությունների ձեռքբերումը:

«Հնարավորություն ունեինք մասնակցելու «Սեյվ դը չիլդրեն»-ի ծրագրերին, արդյունքում իմ նախաձեռնությամբ մեր համայնքում՝ Արագածոտնի մարզի Ոսկեհատ գյուղում կազմակերպեցինք ճամբար գյուղի դպրոցականների համար: Մասնակցում էր մոտ 100 դպրոցական: Անցկացրել ենք դասընթացներ, որոնց շրջանակում աշակերտները նոր հմտություններ ձեռք բերեցին՝ կապված հանրային խոսքի, աշխատանքի ընդունվելու, հաղորդակցության հետ»,-ասաց նա: Իրականացվել են նաև բնապահպանական նախաձեռնություններ: