Սիրիայում գնդակոծման է ենթարկվել ՄԱԿ-ի դիտորդների ավտոշարասյունը

Սիրիայում ՄԱԿ-ի դիտորդների ավտոշարասյունը, որի կազմում էին նաև առաքելության ղեկավար, սենեգալացի գեներալ Բաբաքար Գայեն, գնդակոծության է ենթարկվել, այս մասին երկուշաբթի օրը հայտարարել է ՄԱԿ-ի գլխավոր քարտուղար Պան Կի Մունը. հաղորդում է The Associated Press-ը։

Հինգ մեքենաներից բաղկացած ավտոշարասյունը գնդակոծության էր ենթարկվել կիրակի օրը՝ հուլիսի 29-ին, Հոմս քաղաքից 17 կիլոմետր հեռավորության վրա։ ՄԱԿ-ի դիտորդներից և ոչ մեկը չի տուժել, սակայն փամփուշտները դիպչել են հինգ մեքենաներից երկուսին։ Թե ով է ավտոշարասյունը գնդակոծության ենթարկել, կառավարական զորքերը, թե ընդդիմադիր ուժերը՝ չի նշվում:

Հիշեցնենք, որ ՄԱԿ-ի դիտորդները մեկնել էին Սիրիա 2012 թ. գարնանը, երբ խոսքը գնում էր ՄԱԿ-ի և Արաբական լիգայի հատուկ ներկայացուցիչ Քոֆի Անանի խաղաղության ծրագրի իրականացման մասին։ Սակայն հասնել «Անանի պլանի» իրականցմանը, որը նախատեսում էր ռազմական գործողությունների դադարեցում և մարդասիրական կազմակերպությունների՝ Սիրիա մուտքի թույլտվություն, այդպես էլ չհաջողվեց։

Հիշեցնենք նաև, որ Սիրիայում հակամարտությունը շարունակվում է 2011 թվականի մարտից, որի ընթացքում, ըստ ՄԱԿ-ի տվյալների, զոհվել է 17,000 մարդ: Արևմտյան երկրները և մի շարք արաբական երկրներ ՄԱԿ-ի Անվտանգության խորհրդի միջոցով փորձում են հեռացնել Ասադին՝ համարելով, որ դա կդադարեցնի բռնությունները: Սակայն Ռուսաստանը և Չինաստանը վախենում են, որ արտաքին միջամտությունը կհանգեցնի հակամարտության սրման: