Թավրիզ-Հայաստան ավտոմայրուղու վերանորոգումը ֆանտաստիկայի ժանրից չէ. իրանագետ

Օրեր առաջ Երևանում անցկացված ԵԱՏՄ գագաթաժողովին մասնակցեց նաև Իրանի իսլամական հանրապետության նախագահ Հասան Ռուհանին:

Հայ-իրանական հարաբերություններում սպասվող փոփոխությունների, ձեռք բերված արդյունքների մասին ԼՈՒՐԵՐ.com-ի թղթակիցը զրուցեց իրանագետ Ահարոն Վարդանյանի հետ․

«Հայ–իրանական հարաբերությունները միշտ էլ զարգացել են՝ անկախ օրվա իշխանությունից: Կարծում եմ, որ այդ հարաբերությունները պետք է մշտապես զարգանան, քանզի դրան այլընտրանք չկա: Մեր համագործակցությունը տեղի է ունենում ամենատարբեր մակարդակներով ու բավական հաճախ»,- նշեց նա:

Ըստ իրանագետի՝ այդ հանդիպումները միշտ էլ արդյունավետ են լինում: Որից հետո հրապարակվում են արդյունքներ, թվեր: Սակայն կարևորը հանդիպումներում ձեռք բերված պայմանավորվածությունները ռեալիզացնելն է, ինչը լինում է միայն հետևողական աշխատանքի արդյունքում:

«Նկատենք, որ վերջին հանդիպումը երկկողմ չէր: Այդ հանդիպումը ԵԱՏՄ շրջանակում էր, ինչը սակայն ամենևին էլ չի նշանակում, որ կարևոր չէր, ընդհակառակը, այս պարագայում՝ եռակողմ համագործակցությունը ևս չափազանց կարևոր է»,- նշեց նա:

Իրանագետն անդրադարձավ նաև Թավրիզ-Հայաստան ավտոմայրուղու վերանորոգման թեմային՝ նշելով, որ ցանկացած ծրագիր հնարավոր է իրական դարձնել, մանավանդ, որ այս ծարագիրը ամենաբարդերց չէ և ոչ էլ ֆանտաստիկայի ժանրից:

«Կարծում եմ՝ դա մաս է կազմում մեր «Հյուսիս- Հարավ» ծրագրի: Այդ ճանապարհը պետք է, եթե մենք ուզում ենք Իրանի հետ լուրջ ծրագրեր իրականացնել: Հարկ է նշել, որ Հ․ Ռուհանին իր խոսքում ակնարկեց նաև երկաթգծի մասին: Իրանական կողմը առաջին անգամը չէ որ խոսում է այդ մասին: Դեռ այս տարվա ամառվանից իրանական փորձագիտական դաշտում այդ թեման շոշոփվում է, և հիմա էլ մենք ականատես եղանք այդ հարցի ամենաբարձր մակարդակով արծարծմանը: Արժե հետևողական լինել, որպեսզի այս ծրագիրը կյանքի կոչվի, կամ վատագույն դեպքում մշտապես թեման տաք պահվի և ձեռքն, այսպես ասած, պահվի զարկերակի վրա, մինչև համապատասխան ներդրողներ գտնելը»,- նշեց Վարդանյանը:

Իրանագետը իրատեսական է համարում նաև գազ՝ էլեկտրաէներգիայի դիմաց ծրագիրը, մանավանդ որ խոսք է գնում ոչ թե նոր համագործակցության ՝ այլ ընդամենը ծավալները մեծացնելու մասին: