Ինչպես խնամել շուրթերը

Հաճախ սահմանափակվելով փայլով կամ շրթներկով՝ երբեմն ուշադրություն չենք դարձնում շրթունքների՝ առաջին հայացքից մանրուք թվացող չորությանը, մանր ճաքերին կամ թեփուկների առաջացմանը։ Այնինչ, շուրթերի կոլագենային շերտը չափազանց բարակ և նուրբ է, որի պատճառով մաշկի ծերացման առաջին նշանները հաճախ նկատվում են դրանց մոտակայքում։

Շրթունքների վնասվելու հիմնական պատճառներն են.

- ուլտրամանուշակագույն ճառագայթները, քամին, ցուրտը,

- հոգնած կամ սթրեսային վիճակում դրանց մերթ-մերթ կրծոտելը,

- A, E և B խմբի վիտամինների (հատկապես՝ B2-ի և քոլինի) պակասը օրգանիզմում,

- հերպեսը, որը հայտնի է «մրսածություն շրթունքների վրա» անվանմամբ,

- ծխելը։

Բերանի անկյուններում ճաքերն առաջանում են հիպովիտամինոզի կամ բերանի խոռոչի հիվանդությունների դեպքում։ Այս հիվանդությունն ավելի շատ հանդիպում է ծխողների մոտ, փորձը ցույց է տալիս, որ գլանակների թիվը պակասեցնելը նպաստում է արագ ապաքինմանը։ Հիվանդության առաջացմանը կարող է նպաստել ֆտոր պարունակող ատամի մածուկը և շրթներկը փոխելը։

Մարդկանց ավելի քան 90 տոկոսի մոտ առկա է հերպեսի պարզ տեսակի վիրուսը, որն արտահայտվում է դիմադրողականության անկման, մրսածության, ալկոհոլի չարաշահման, սթրեսի, ստամոքսի խանգարման, գերհոգնածության և այլ դեպքերում։ Եթե ձեռնարկված միջոցները չեն օգնում 10-15 օրվա ընթացքում, ապա պետք է դիմել բժշկի, հերպեսը կարող է լուրջ հիվանդության հետևանք հանդիսանալ։ Ոչ մի դեպքում չի կարելի վերքին ձեռք տալ, նույնիսկ դրա չորանալուց հետո, այլապես վիրուսը կփոխանցվի մարմնի այլ մասերին։ Դեռևս հնում կանայք  խնամում էին իրենց շրթունքները՝ քսելով սպիտակ մեղրամոմի, հավի և սագի յուղերի խառնուրդը։

Այժմ մեղրի հիման վրա արտադրվում են բազմաթիվ միջոցներ շրթունքների խնամքի համար։ Որպես տարբերակ ՝ շրթունքներին կարող եք հավասար ծավալային հարաբերությամբ քսել մեղրի և եթերային յուղի, հյութի կամ խյուսի խառնուրդը։ Հարմար է հալվեի հյութը, դեղձի, ավոկադոյի, ադամաթուզի, գազարի խյուսը։ Օգտակար և արդյունավետ միջոց է մեղրի և ձկան յուղի խառնուրդը։