Արսեն Թորոսյանն ընդունել է Հնդկաստանի դեսպան Կիշան Դան Դևալին

Առողջապահության նախարար Արսեն Թորոսյանն ընդունել է Հայաստանում Հնդկաստանի նորանշանակ արտակարգ և լիազոր դեսպան Կիշան Դան Դևալին:

Ինչպես հայտնեցին ՀՀ առողջապահության նախարարությունից, նախարարը նորանշանակ դեսպանին շնորհավորել է պաշտոնը ստանձնելու կապակցությամբ: Քաղաքավարական հանդիպման շրջանակներում կողմերը քննարկել են համագործակցության շրջանակները:

Կողմերը քննարկել են  դեղարտադրության և դեղերի ներմուծման վերաբերյալ հարցերը: Արսեն Թորոսյանը նշել է, որ հնդկական դեղագործությունը ոչ միայն բարձրորակ է, այլև ծախսարդյունավետ: Խոսվել է նաև հիվանդանոցների կառավարման, փոխպատվաստումների և ռեսուրսների ճիշտ և օպտիմալ օգտամործման վերաբերյալ:

Առողջապահության նախարար Արսեն Թորոսյանը դեսպանին է ներկայացրել նաև Ակադեմիկոս Ս. Ավդալբեկյանի անվան առողջապահության ազգային ինստիտուտում կլինիկական օրդինատուրայի նոր ծրագրերի մեկնարկի մասին:

Կիշան Դան Դևալը նշել է, որ Հնդկաստանը պատրաստ է շարունակել համագործակցությունը բոլոր ուղղություններով, ինչպես նաև աջակցել մարզերում իրականացվող առողջապահական ծրագրերին:

Նախարարը հաջողություն է մաղթել դեսպանին և նշել, որ Հնդկաստան այցի ընթացքում մեծ ցանկություն ունի հանդիպելու Հնդկաստանի առողջապահության նախարարին: