Սերժ Սարգսյանը դեռևս հրավեր չի ստացել Ապրիլյան պատերազմի հանգամանքները քննող հանձնաժողովից

«Ապրիլյան պատերազմի առնչությամբ ստեղծված քննիչ հանձնաժողովի այսօրվա հերթական հանդիպումից ու քննարկումից հետո, ԱԺ պաշտպանության և անվտանգության հարցերի մշտական հանձնաժողովի նախագահ, ապրիլյան պատերազմի հանգամանքները քննող հանձնաժողովի նախագահ Անդրանիկ Քոչարյանը նշեց, որ Ապրիլյան պատերազմի հարցով ԱԺ քննիչ հանձնաժողովի նիստերին կարող է հրավիրվել նաև ՀՀ երրորդ նախագահ, 2016թ–ին բանակի գերագույն գլխավոր հրամանատար Սերժ Սարգսյանը։

Նրա խոսքով՝ առաջիկայում մի շարք նախկին և ներկա բարձրաստիճան պաշտոնյաներ են հրավիրվելու հարցաքննության և չի պատկերացնում՝ ինչպես կարող են մերժել մի հանձնաժողովի հրավեր, որը միտված է Ապրիլյանի դեպքերի ուսումնասիրությանը։

«Ակնկալում եմ, որ նույնիսկ Սերժ Սարգսյանը չի մերժի քննիչ հանձնաժողովի հրավերը։ Հարցեր կան, որ գերագույն գլխավոր հրամանատարին էլ պետք է ուղղենք»,- նշեց նա։ 

ԼՈՒՐԵՐ․com-ը 2-րդ նախագահի գրասենյակի ղեկավար Մերի Հարությունյանից հետաքրքրվեցինք՝ ԱԺ քննիչ հանձնաժողովից Սերժ Սարգսյանը հրավեր ստացել է, թե՞ ոչ․ «Եթե հրավիրել են, հրավեր դեռևս չենք ստացել, եթե հրավիրելու են, դա արդեն այլ հարց է։ Երբ նման հրավեր լինի այդ ժամանակ կմեկնաբանենք»,- նշեց նա։

Հարցին՝ այնուամենայնիվ հրավերի դեպքում 3-րդ նախագահը կներկայանա՞ հանձնաժողով, վերջինիս գրասենյակի ղեկավարը չցանկացավ մեկնաբանել։ 

Նշենք, որ Ապրիլյանի դեպքերի վերաբերյալ ուսումնասիրություններ իրականացնելու, տեղեկություններ հավաքագրելու համար հանձնաժողովին տրվել է 6 ամիս ժամանակ, որից 4-ն արդեն անցել է։ Անդրանիկ Քոչարյանը նշեց՝ ամբողջական տեղեկատվություն ստանալ չհաջողվելու դեպքում իրենք կարող են դիմել ԱԺ՝ ժամկետները երկարացնելու համար։