ՊԵԿ նախագահի «սառույցին գրված խոստումը»․ ինչո՞ւ չի բացվում նոր մաքսատունը

Ավտոմաքսատունը Երևանից Գյումրի տեղափոխելու որոշման դեմ բողոքող ավտոներկրողներից մի քանիսը երեկ՝ հոկտեմբերի 13-ին, հանդիպել են ՀՀ ոստիկանապետի պաշտոնակատար Արման Սարգսյանի հետ։ Ավտոներկրողների բողոքի ակցիան համակարգող, Ավտոներկրողների միության նախագահ Տիգրան Հովհաննիսյանը ԼՈՒՐԵՐ․com-ի հետ զրույցում ասաց, որ  ոստիկանապետի պաշտոնակատարի հետ քննարկել են ավտոմաքսատունը Երևանից Գյումրի տեղափոխելու որոշման կասեցման ավտոներկրողների պահանջը։ 

«Ոստիկանապետն ասաց՝ «եկեք չբախվենք միմյանց, գրավոր առաջարկներ ներկայացրեք, որը կփոխանցենք վարչապետին»։ Մենք կներկայացնենք մեր առաջարկները, որտեղ անդրադարձել ենք մի շարք խնդիրների։ Վրաստանի վարչապետը գալիս է Հայաստան, խնդրել ենք նրան փոխանցել Փոթի նավահանգստի անտանելի վիճակի մասին, որպեսզի այնտեղ աջակցություն ունենանք, քանի որ մեքենաները չեն բեռնաթափվում, տուգանքների տակ են գցում, թալանում են ավտոմեքենաները, անգամ ավտոմեքենաներ են գողանում։ Հաջորդ խնդիրը, որը քննարկեցինք ոստիկանապետի պաշտոնակատարի հետ ավտոմաքսատունը Երևանից Գյումրի տեղափոխելու մասին էր, քանի որ չի կարելի մարդուն ասել՝ դու պետք  է գնաս Գյումրի»,- ասաց Հովհաննիսյանը։ 

Ավտոներկրողները դժգոհ են, որ մաքսատունը տեղափոխվում է ոչ թե նորակառույց մաքսատուն, այլ Գյումրու հին տարածքը, իսկ հին տարածքը, նրանց համոզմամբ, չի կարող սպասարկել մի քանի մարզերի բնակիչներին։ Ինչ վերաբերում է Գյումրիի նոր մաքսատանը, որի բացումը նախատեսված էր հոկտեմբերի 11-ին, այդպես էլ չբացվեց։ ՊԵԿ նախագահ Դավիթ Անանյանի «խոստումը սառույցին գրվեց»։

«Պաշտոնը կորցնելու, թե ՊԵԿ-ի սուտ հայտարարությունները փրկելու համար, որոշել են մաքսատունը տեղափոխել հին տարածք, բայց իրավիճակը մեկ շաբաթ հետո պայթելու է։ Սուտ հայտարարություններ արեցին, թե նոր ավտոմաքսատունը 10 օրից, 15 օրից կբացվի, բայց ես վստահ եմ, որ մինչև տարեվերջ չի էլ բացվելու։ ՊԵԿ-ն անգամ ամաչում է հայտարարություն տարածել ժամկետների վերաբերյալ, որովհետև խայտառակվել են։ Շինարարական ընկերության ներկայացուցիչը հայտարարեց, թե եղանակները վատն են, չեն կարողանում հասցնել կառուցել մաքսատունը։ Բա որ եղանակները վատն են ո՞նց կարող են հազարավոր վարորդներ վատ եղանակին հասնել Գյումրի։ Մենք ձեռներեցներ ենք և Երևանից Գյումրի հասնելու համար ավելորդ ծախսեր են առաջանում։ Ամեն մեքնեան մեզ վրա մոտ 300 դոլար է նստելու,- ասաց նա՝ նշելով, որ ՊԵԿ-ի քաղաքականությունը միտված է միմյանց դեմ հանել երևանցիներին ու գյումրեցիներին։

Մենք, նոր ավտոմաքսատան բացման վերաբերյալ պարզաբանում խնդրեցինք նաև ՊԵԿ-ից, սակայն այստեղից փոխանցեցին, որ դրա վերաբերյալ դեռևս մեկ շաբաթ առաջ են հայտարարություն տարածել, որն առկա է իրենց կայքում։ Սակայն մենք այդպես էլ չկարողացանք գտնել նշված հայտարարությունը։  

Հիշեցնենք, որ ավելի վաղ հայտարարվել էր, որ Վրաստանից և Ճապոնիայից արտահանված և հոկտեմբերի 14-ից Հայաստան ներմուծված թեթև մարդատար ավտոմեքենաների մաքսային ձևակերպումներն իրականացվելու են Գյումրիում գտնվող Հյուսիսային մաքսատուն-վարչությունում։ Եթե դրանք սահմանը հատել են հայ-իրանական հատվածում, ապա Սիսիանում գտնվող Հարավային մաքսատուն-վարչությունում: Տրանսպորտային մյուս միջոցների մաքսային ձևակերպումներն առայժմ կիրականացվեն ապակենտրոնացված եղանակով՝ հայտարարատուի նախընտրած մաքսատանը։

Սոնա Հարությունյան

Լուսանկարները՝ Yerevan.today-ի