Ադրբեջանցիներն իրենց սարքած ծուղակը կընկնեն և կպայթեն սեփական ականների վրա. Դավիթ Բաբայան (տեսանյութ)

Համացանցում հայտնվել է մի տեսանյութ, որտեղ երևում են Արցախի սահմանամերձ Ադրբեջանի Թարթառի շրջանում (Մարտակերտի շրջանի ուղղությամբ) հավաքված մեծ թվով ադրբեջանցիներ: Ըստ տարածված լուրերի՝ նրանք ցանկություն ունեն դրոշներով ու «Ղարաբաղը Ադրբեջան է» գրությամբ ցուցանակներով Արցախի սահմանը հատել:

ԼՈՒՐԵՐ.com-ի հետ զրույցում Արցախի նախագահի մամուլի քարտուղար Դավիթ Բաբայանը նշեց, որ դեռևս հայտնի չէ տեսանյութը նոր է, թե հին, քանի որ նախկինում ևս նման տեսանյութեր են տարածվել նրանց կողմից: Նրա խոսքով՝ ակցիաների նպատակն ընդամենն իրենց մասին հիշեցնելն է:

«Մտահոգվելու խնդիր չկա և հարկավոր է սառնասրտորեն մոտենալ նրանց կողմից իրականացվող գործընթացներին. ոչ առաջին, ոչ էլ վերջին անգամն է: Մենք այսպիսի ֆլեշմոբերին պետք է վերաբերվենք այնպես ինչպես այն կա: Դա լուրջ միջոցառում չէ, դա սելֆիներ անելու տարբերակներից մեկն է: Նրանք բազմիցս եկել նկարվել, սելֆիներ են արել սահմանին, ներկայացրել են, թե իբր հատում են սահմանները: Սակայն դրանով իրենց նեղ քաղաքական նպատակներն են փորձել լուծել»,- ասաց նա՝ ծիծաղելի համարելով ադրբեջանական նման գործելաոճը:

Թե ադրբեջանական ո՞ր կազմակերպության կողմից է կազմակերպվել ակցիան, հայտնի չէ, սակայն  Բաբայանի խոսքով՝  ադրբեջանական «Ղարաբաղի ազատագրման կազմակերպություն»-ը մի քանի տարին մեկ նմանատիպ «ակցիաներ» է փորձում կազմակերպել՝ սև փիառ իրականացնելով. «Սա շանտաժ է: Ադրբեջանի իշխանությունները շատ լավ գիտակցում են, թե այն ինչ հետևանքներ կունենա, հետևաբար չեմ կարծում՝ թողնեն, որ նրանք նույնիսկ մոտենան իրենց իսկ դիրքերին: Հետևանքները շատ անկանխատեսելի կարող են լինել, քանի որ եթե անգամ մեր զինվորները չկրակեն, ապա իրենց իսկ սահմանին այնքան ականապատված տարածքներ կան, որ անհնարին է՝ կարողանան հատել սահմանը. իրենք իրենց սարքած ծուղակը կընկնեն և կպայթեն սեփական ականների վրա»,- նկատեց Բաբայանը:

Սոնա Հարությունյան

Տեսանյութը՝ Alen Ghulyan-ի ֆեյսբուքյան էջից