Ցոլակյանն աղետների ռիսկերի պատշաճ կառավարման նպատակով տեսնում է օրենսդրության վերանայման կարիք

ՀՀ արտակարգ իրավիճակների նախարար Ֆելիքս Ցոլակյանն աղետների հետևանքով ծագած խնդիրների դեմ պայքարելու փոխարեն կարևորում է դրանց կանխարգելման համար քայլերի ձեռնարկումը: Նախարարն այս առումով օրենսդրական կարգավորման վերանայման կարիք է տեսնում: Նա նման տեսակետ հայտնեց «Դիմակայուն Հայաստան» խորագրով խորհրդարանական լսումներում:

«Որպես լեռնային և նաև նախկին ինդուստրիալ երկիր՝ Հայաստանում եղել են բնական և տեխնոլոգիական վտանգավոր երևույթներ: Դրանց բացասական ազդեցությունն ակնհայտ է մինչև օրս: Միևնույն ժամանակ առկա են գլոբալ տաքացման և արագ ուրբանիզացման օրեցօր ավելացող խնդիրները, որոնք մեծացնում են տարատեսակ աղետների ռիսկը և բնակչության խոցելիությունը: Մենք հիմնականում պայքարում ենք արդեն ծագած աղետի հետևանքների դեմ:  Սակայն դրանց մեծ մասը կարող են նվազ ազդեցություն ունենալ և պակաս կորուստներ պատճառել համապատասխան կանխարգելիչ միջոցառումներ իրականացնելու դեպքում»,-ասաց Ցոլակյանն ու հավելեց՝ նմանատիպ ռիսկերի գնահատումը, դրանց հնարավորինս մեղմումը պետք է հանդիսանան երկրի տնտեսության զարգացման անկյունաքարերից մեկը:

Նախարարը շեշտեց՝ գործող օրենսդրական կարգավորումները վերանայման և բարեփոխման խնդիր ունեն, որին պետք է ուղղել ջանքերը: Նրա կարծիքով՝ Աղետների և ռիսկերի կառավարման ազգային ռազմավարությունը պետք է հիմք հանդիսանա պետական բոլոր օղակների համար, դիտարկվի որպես կարևորագույն բաղադրիչ զարգացման գործընթացներում՝ պլանավորումից մինչև իրականացում:

Ցոլակյանը չափազանց կարևորեց նաև աղետների և ռիսկերի նվազեցման գործընթացում պետության և հասարակության բոլոր միավորների համագործակցությունը: Նա նկատեց, որ միջազգային փորձի կիրառումը ևս խիստ կարևոր է: «Մենք այլընտրանք չունենք, քան ուժեղ և դիմակայուն երկիր կառուցելու պատասխանատվություն ստանձնելը»,-եզրափակեց նախարարը: