Ո՞ւմ «հագով» է «Իմ քայլը» «կարում» նոր օրենքը

ՀՀ ԱԺ պատգամավորները սկսել են աշխատել «Կուսակցությունների մասին» օրենքի փոփոխությունների նախագծի վրա՝ փորձելով այն իրականություն դարձնել մինչև հունվարի 1-ը։ Նախագիծը մշակելիս՝ ինչպես իրենք՝ պատգամավորներն են ընդգծում, մեծ ուշադրություն են դարձնելու կուսակցությաննների ֆինանսական աղբյուրների թափանցիկության, հաշվետվողականության և ներքին ժողովրդավարության հարցերին։ Պարզից էլ պարզ է, որ այս գործընթացի նպատակը կուսակցությունների ֆինանսական ելքերը և մուտքերը վերահսկելու իշխանությունների բուռն ցանկությունն է: Ազատականացման շրջանակում մյուս առաջարկությունը տարածքային ստորաբաժանումներ ունենալու պահանջն է, որը բարդ ֆորմուլայով է ներկայացված այսօրվա օրենքում, բայց պահանջվում է գրանցված տարածքային ստորաբաժանումներ ունենալ մարզերի 1/4-ում:

Համաձայնեք՝ սա նույնպես տեխնիկական տեսանկյունից փոքր-ինչ դժվար կյանքի կոչվող պահանջ է: Ըստ էության՝ իշխանությունները այս օրենքի նախագծով ժողովրդավարության քողի տակ ուզում են քաղաքական կուսակցություններին անկախություն տալու իմիտացիա ստեղծել, սակայն վերջնական արդյունքում քաղաքական կուսակցությունների ողջ գործունեությունը վերահսկվելու է պետության կողմից: Իսկ ո՞վ է պետությունը. զուտ ռեսուրսների և լծակների տեսանկյունից՝ օրվա իշխանությունները: Հետևաբար օրվա իշխանությունների շահերից չի բխում, որ նոր քաղաքական ուժեր մտնեն դաշտ, կամ առավել ևս՝ եղածների անկախությունը ընդլայնվի: Ֆինանսական հոսքերի ստուգումը հենց այն գործիքն է, այն լծակը կամ մահակը, որը ցանկացած պահի կարող է կիրառվել այս կամ այն քաղաքական կուսակցության դեմ:

Դժվար չէ անգամ պատկերացնելը, որ եթե լինի նման պահանջ , ապա Նոր Հայաստանում մենք անգամ կարող ենք կուսակցությունների արգելմանը ականատես լինել: Հանրությունը դժվար թե մոռացած լինի, թե ինչպես էին հեղափոխությունից հետո մի շարք իմքայլականներ դեմքի լուրջ արտահայտությամբ պահանջում փակել ՀՀԿ-ն: Նոր օրենքը, նոր իշխանությունների ինտերպրետացիայով գուցե և տա նման հնարավորություն, սակայն արդեն իսկ հասկանալի է, որ ինչպես և ՀՀԿ-ն, այնպես էլ ՔՊ-ն փորձում է մոնոպոլիզացնել քաղաքական դաշտը: Եթե ՀՀԿ-ն ու Սերժ Սարգսյանը իրենց «հագով կարում» էին Սահմանադրությունը, ապա նորերը անում են նույնը, պարզապես Սահմանադրությանը դեռ հերթը չի հասել…