Մարզպետի մեկ տարվա «ձեռքբերումները». ֆբ էջից մինչև 1500 նոր հեկտարի հայտնաբերում

Այսօր իր պաշտոնավարման մեկ տարին է ամփոփել Գեղարքունիքի մարզպետ Գնել Սանոսյանը: Վերջինս համեստորեն չցանկացավ ներկայացնել իր կատարած արդյունավետ աշխատանքների ողջ ցանկը, նաև ակնարկեց, որ լրատվամիջոցների սիրտը կարող է չդիմանալ այդքան մեծ թվով լավ նորություններից: Հասարակության հանդեպ նման հոգատարությունը, ինչ խոսք, գովելի է, սակայն այնուամենայնիվ թվարկենք մարզպետի նշած մի շարք կարևորագույն ձեռքբերումները: Ըստ Սանոսյանի՝ իր ղեկավարած մարզը ունի զարգացման երեք հիմնական ուղղություն՝ տուրիզմը, գյուղատնտեսությունը և այլընտրանքային էներգետիկան:

Թե այս ուղղությամբ ինչ է արվել, այդպես էլ պարզ չդարձավ: Թերևս, այդ նույն հանրությանը ուրախությունից և էյֆորիայից չվնասելու անզնիվ մղումները հետ պահեցին մարզպետին այս ոլորտի հետ կապված թվեր ներկայացնելուց: Փոխարենը նա թվարկեց մանկավարժների և վարչական աշխատողների աշխատավարձի բարձրացումը, Գավառի թատրոնի բացումը, Վարդենիսի երեք դպրոցների ջեռուցման հարցի լուծումը, Վարդենիսի հիվանդանոցի պարտքի մարումը, քրեական վարքագծով անչափահասների թվի կրճատումը, հողաշինության ոլորտում 1500 նոր հեկտարի հայտնաբերումը, թվով 7 ճանապարհաշինական աշխատանքների իրականացումը: Մարզպետը խոսեց նաև ներդրումներից` խոստանալով, որ մոտ ապագայում մարզ են այցելելու արաբական և չինական պատվիրակությունները և ներդրումների հարցը դեռևս նոր-նոր կարող է միս ու արյուն ստանալ: Այսինքն` մեկ տարվա մեջ մարզպետին այդպես էլ չի հաջողվել քիչ թե շատ խոշոր ներդրում բերել մարզ, բայց փոխարենը այլ ոլորտներում տիտանական աշխատանք է կատարվել, օրինակ` բացվել է մարզպետարանի ֆեյսբուքյան էջը:

Համաձայնեք, եթե նման գործը մարզպետը ներկայացնում է մեկ տարվա աշխատանքի ամփոփման ընթացքում, դա նշանակում է, որ ամփոփելու, մեղմ ասած, այլ նյութ ու թեմա չկա: Ըստ Սանոսյանի՝ մարզպետարանը 13 կառույցում աուդիտ է անցկացրել, ընդ որում` նաև հենց մարզպետարանում: Պարզից էլ պարզ է, որ աուդիտի նպատակը նախկինների վրա կեղտ գտնելն էր, սպասենք, տեսնենք, թե ի վերջո ինչ են գտել: Ըստ մարզպետի՝ մեծ թվով չարաշահումներ են հայտնաբերվել, գործեր են ուղարկվել դատախազություն, սակայն այդ մասին իրավապահ մարմինները դեռ համեստորեն լռում են…թերևս, նույնպես մտահոգվում են հասարակության լայն զանգվածների մասին: Այդքան մեծ էյֆորիայի դիմանալը բարդ է…