Սիրիական ընդդիմությունը Թուրքիայից ստացել է ՀՕՊ համակարգերի առաջին խմբաքանակը

Սիրիական ընդդիմությունը առաջին անգամ ստացել է շարժական ՀՕՊ համակարգերի ոչ մեծ խմբաքանակ, հաղորդում է Reuters-ը՝ հղում անելով NBC News-ին։

Սիրիական այսպես կոչված «Ազատ բանակի» անդամները, ըստ չնշվող աղբյուրների, այժմ ունեն Թուրքիայից բերված մոտ 20 ՀՕՊ համակարգ։ Ընդ որում, ՀՕՊ համակարգերի տեսակի մասին ոչինչ չի հաղորդվում։ Նշվում է միայն, որ ներկայումս Սիրիայի բանակը Հալեպ քաղաքում շարունակում է պայքարը զինված ընդդիմության դեմ։ Ըստ լրատվամիջոցների, զինվորականները թշնամու դեմ ակտիվորեն օգտագործում են մարտական ուղղաթիռներ և ինքնաթիռներ։

Տեղեկությունները, թե ինչ է իրականում կատարվում Հալեպում, խիստ հակասական են։ Սիրիական անկախ Al-Watan թերթը երեքշաբթի օրը գրել էր, որ կառավարական զորքերը վերահսկողության տակ են վերցրել Հալեպի Սալահ Էդ-Դին, Սահուր և Սուքար թաղամասերը, մարտեր են ընթանում նաև Համդանիյա, Մաշհադ, Անսարի, Սեյֆ ալ-Դավլա, Զաբդիյա թաղամասերում։

Իր հերթին, զինված ընդդիմությունը պնդում է հակառակը։ Հունիս ամսին ամերիկյան New York Times թերթերը, վկայակոչելով ԱՄՆ վարչակազմի անանուն ներկայացուցիչներին և արաբական պետությունների հետախուզական մարմինների աշխատակիցներին, գրել է, որ Թուրքիայի հարավում գտնվում է ԱՄՆ-ի Կենտրոնական հետախուզական գործակալության աշխատակիցների մի փոքր խումբ, որը կարգավորում է զենքի մատակարարումը սիրիացի ապստամբներին։

Հիշեցնենք, որ 2012 թ. հուլիսի 30-ին ԱՄՆ Պետդեպարտամենտը հայտարարել է սիրիական ընդդիմությանը ցուցաբերվող աջակցության ընդլայնման մասին։