Հայ-բելառուսական ռազմատեխնիկական համագործակցությունը նոր շունչ կստանա

Հուլիսի 30-ին ՀՀ վարչապետ Տիգրան Սարգսյանը հայ-բելառուսական ռազմատեխնիկական համագործակցության միջկառավարական հանձնաժողովի 2-րդ նիստը Հայաստանի Հանրապետությունում անցկացնելու մասին որոշում է կայացրել: Նիստը կայանալու է սույն թվականի սեպտեմբերի 11-14-ը: Նիստի անցկացման և հյուրերի (25 մարդ)՝ Հայաստանի Հանրապետությունում գտնվելու հետ կապված ծախսերը՝ 12,607,500 դրամի սահմաններում, կատարվելու են ՀՀ 2012 թ.-ի պետական բյուջեով ՀՀ պաշտպանության նախարարության համար նախատեսված ընդհանուր միջոցների հաշվին։

Հիշեցնենք, որ 2012թ.-ի հունվարի 12-ին Ազգային անվտանգության խորհրդի (ԱԱԽ) քարտուղար Արթուր Բաղդասարյանի Մինսկ կատարած այցի ժամանակ քննարկվել էր Հայաստանի ազգային անվտանգության խորհրդի և Բելառուսի Անվտանգության խորհրդի պետական քարտուղարության միջև 2012-2013 թթ. համագործակցության ծրագիրը: Կողմերը գոհունակություն են հայտնել երկու երկրների միջև բարեկամական հարաբերությունների առկա մակարդակի կապակցությամբ և ընդգծել, որ այդ գործընկերային հարաբերությունները մեծապես կնպաստեն անվտանգությանն առնչվող ոլորտներում, ինչպես նաև ռազմաքաղաքական, առևտրա-տնտեսական և այլ ասպարեզներում երկկողմ համագործակցության էլ ավելի խթանմանը: Հայկական պատվիրակության և Բելառուսի Հանրապետության Ռազմարդյունաբերության պետական կոմիտեի հետ հանդիպման ժամանակ քննարկվել էին ռազմարդյունաբերության ոլորտում համագործակցության խթանման և հայ-բելառուսական համատեղ ձեռնարկություններ հիմնելու վերաբերյալ հարցեր:
Բելառուս կատարած այցից հետո ՀՀ Ռազմարդյունաբերության համալիրի զարգացման հարցերը համակարգող միջգերատեսչական հանձնախումբը Ա. Բաղդասարյանի գլխավորությամբ սկսել է մշակել Հայաստանի ռազմարդյունաբերության համալիրի զարգացման հայեցակարգը և կոնկրետ քայլեր ձեռնարկել ռազմարդյունաբերության համալիրի ձեռնարկություններին անհրաժեշտ աջակցություն ցուցաբերելու ուղղությամբ, որպեսզի նրանք կարողանան արդյունավետ աշխատել:

Ուստի այս տարվա սեպտեմբերի 11-14-ը կայանալիք միջկառավարային հանձնաժողովի 2-րդ նիստի ընթացքում կշարունակվեն երկկողմ համագործակցության առնչվող հարցերի քննարկումը, և նոր շունչ կստանա հայ-բելառուսական համագործակցությունը:

Երկկողմ համագործակցության գլխավոր նպատակը երկրի պաշտպանունակության բարձրացումն ու զինված ուժերին անհրաժեշտ տեխնիկայով ապահովումն է: Ռազմարդյունաբերության զարգացումը նաև սոցիալական խնդիրներ կլուծի՝ կստեղծվեն նոր աշխատատեղեր: