Հանցավորության դեմ պայքարի ոլորտում համագործակցությունը ոչ միայն անհրաժեշտ է, այլև՝ պարտադիր

Նոյեմբերի 29-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց Հայաստանի Հանրապետությունում Ռուսաստանի Դաշնության  արտակարգ և լիազոր դեսպան Վյաչեսլավ Կովալենկոյին և նրան ուղեկցող պաշտոնատար անձանց:

Ողջունելով հյուրերին` ոստիկանության պետն ընդգծեց, որ հայ-ռուսական գործընկերային հարաբերությունները օրեցօր սերտանում են` ընդգրկելով նորանոր բնագավառներ, այդ թվում` հանցավորության դեմ պայքարի ոլորտը, որտեղ համագործակցությունը ոչ միայն անհրաժեշտ, այլև պարտադիր է` նկատի ունենալով երկու երկրների իրավապահ կառույցներին ուղղված նորագույն մարտահրավերները:

Վլադիմիր Գասպարյանը գոհունակություն հայտնեց, որ այդ ոլորտում ՀՀ ոստիկանության և ՌԴ ՆԳ նախարարության փոխգործակցությունը ավելի քան գործընկերային է, և հույս հայտնեց, որ առավել կխորանա` արձանագրելով ցանկալի արդյունքներ:

Ռուսաստանի Դաշնության արտակարգ և լիազոր դեսպան Վյաչեսլավ Կովալենկոն նշեց, որ ՌԴ դեսպանատունն ավանդաբար սերտորեն համագործակցել է ՀՀ ոստիկանության հետ և հավաստիացրեց, որ այդ, ինչպես և երկու երկրների ոստիկանական կառույցների գործընկերությունն առաջիկայում կընդլայնվի` ի շահ հանցավորության դեմ համատեղ պայքարի հաջողության:

Վլադիմիր Գասպարյանը ներկայացրեց ՀՀ ոստիկանությունում շարունակվող բարեփոխումների ընթացքը և առաջիկա անելիքները, որոնցով նախատեսվում է որակական առաջընթաց համակարգի ինչպես կառուցվածքային, այնպես էլ գործառնական ուղղություններով:

Հանդիպման ընթացքում կողմերը քննարկեցին մասնագիտական կրթության ու կադրերի վերապատրաստման ոլորտում համագործակցության հեռանկարները, փորձի փոխանակման արդյունավետության բարձրացման խնդիրները, ինչպես և հայ-ռուսական ոստիկանական փոխգործակցության այլ հարցեր: