Լիբանանի իշխանությունները չեն պատրաստվում արտակարգ դրություն մտցնել բողոքի ակցիաների պատճառով

Լիբանանի կառավարությունը չի պատրաստվում երկրում արտակարգ դրություն մտցնել վեցերորդ օրը շարունակվող բողոքի զանգվածային ակցիաների պատճառով: Այդ մասին ասված է վարչապետ Սաադ Հարիրիի դիվանատան հայտարարության մեջ:

«Կառավարությունն արտակարգ դրություն հայտարարելու մտադրություն չունի, եւ ցուցարարներին թույլատրված է իրենց հանրահավաքների համար օգտագործել Բեյրութի կենտրոնի հրապարակները»,- նշվում է փաստաթղթում, որը հրապարակել է Al Hadath հեռուստաալիքը: Դրա հետ մեկտեղ Լիբանանի իշխանություններն անթույլատրելի են համարում ավտոճանապարհների փակումը մայրաքաղաքի մատույցներում, ինչը կաթվածահար է անում քաղաքի կենսագործունեությունը: Ուստի հանրապետության ՆԳ նախարարությանը ցուցում է տրված ապաարգելափակել Բեյրութը նահանգների հետ կապող բոլոր հիմնական ճանապարհները: Լիբանանի բանակը ոստիկանությանը օժանդակություն կցուցաբերի այդ առաջադրանքը կատարելու գործում:

Ինչպես հայտնել է Al Mayadeen հեռուստաալիքը, հոկտեմբերի 23-ին կկայանա երկրի կոալիցիոն կառավարության սոցիալ-տնտեսական բլոկի նախարարների խորհրդակցությունը, որը նվիրված կլինի անօրինականորեն յուրացված պետական միջոցների վերադարձման մասին օրինագծի քննարկմանը: Այս պահանջը հաստատակամորեն առաջադրում են բողոքի շարժման մասնակիցները:

Ներկայում մեծ թվով ցուցարարներ արգելափակել են Լիբանանի Կենտրոնական բանկի շենքը՝ փակելով երթեւեկությունը Խամրա փողոցով, որը հիմնական առեւտրական զարկերակն է Բեյրութի արեւմտյան մասում: Ակտիվիստները վանկարկում են կարգախոսներ՝ պահանջելով պատասխանատվության ենթարկել ներկայիս ու նախկին նախարարներին, որոնց նրանք մեղադրում են կոռուպցիայի մեջ:

Ավելի վաղ Բեյրութի կենտրոնում կայացած հանրահավաքում ցուցարարները մերժել են ամբողջ երկիրն ընդգրկած զանգվածային բողոքների ալիքին ի պատասխան Սաադ Հարիրիի կաբինետի կողմից մշակված հակաճգնաժամային պլանը: «Մենք չենք հանում այս կառավարության հրաժարականի, խորհրդարանի արձակման եւ վաղաժամկետ ընտրություններ անցկացնելու մեր պահանջները»,- հայտարարել են հանրահավաքի մասնակիցները, հաղորդել է ՏԱՍՍ-ը: