«Խոսրովի արգելոց»-ի շինությունը պատկանում է Հովիկ Աբրահամյանի՞ն. իրավաբան

Այսօրվա մամուլի ասուլիսին էկոլոգիական դաշինքի համակարգող Սիլվա Ադամյանը, անդրադառնալով Գիլանի տարածքում կառուցված շինությանը, ասաց. «Դեռ երկու տարի առաջ շինարարությունը կանգնեցվել էր, ստեղծվեց հանձնաժողով, որը պետք է ուսումնասիրեր շենքի նպատակահարմարությունը, սակայն պարզվում է հանձնաժողովը մածուցիկ վիճում է և խնդրին որևէ լուծում չի տալիս»։

Հետաքրքրական այն է, որ Բնապահպանության նախարարությունը մի քանի անգամ նամակ է ուղղել «Հովազաձոր» ՍՊԸ–ին, սակայն մինչ օրս այդ ընկերությունը չի արձագանքել այդ նամակներին,– նշեց Սիլվա Ադամյանը։

Մամուլի ասուլիսի մյուս բանախոս Արթուր Գրիգորյանը, անդրադառնալով նույն թեմային, ասաց, որ «Խոսրովի արգելոց» քաղաքացիական նախաձեռնությունը և բնապահպան ակտիվիստները պահանջում են.

• Ապամոնտաժել «Խոսրովի անտառ» պետական արգելոցի տարածքում կառուցված քարե շինությունը:
• Դադարեցնել «հակահրդեհային ճանապարհների» անվան տակ «Խոսրովի անտառ» պետական արգելոցում իրականացվող ճանապարհաշինությունը:
• Պատասխանատվության կանչել բոլոր այն պաշտոնատար անձանց, ում մասնակցությամբ «Խոսրովի անտառ» պետական արգելոցի որոշակի հատվածի պահպանման ռեժիմը փոփոխվել է «Գիլան» կոչվող արգելավայրի և այդ տարածքում զվարճանքի օբյեկտ կառուցելու թույլտվություն է տրվել:
• Պարտավորեցնել նշյալ պաշտոնատար անձանց և կառուցապատումն իրականացնող «Հովազաձոր» ՍՊԸ-ին փոխհատուցել բոլոր այն վնասները, որոնք պետք է առաջանան քարե շինությունը (օբյեկտը) ապամոնտաժելու և «Խոսրովի անտառ» պետական արգելոցն իր նախկին վիճակին բերելու ընթացքում։

Բանախոսի տեղեկություներով, արգելոցի շինությունը պատկանում է ԱԺ նախագահ Հովիկ Աբրահամյանին, սակայն հստակ ապացույցներ չկան։