ՀՀ ՊՆ-ն փորձել է «ORSIS»-ից բռնագանձել 105 մլն դրամ. փաստաբանը մանրամասնում է

Արդեն տեղեկացրել էինք, որ ՀՀ ՊՆ-ն և ռազմամթերք արտադրող  ռուսական «ORSIS» ընկերության միջև կան որոշակի տարաձայնություններ: Ընկերության տեսակետը հասկանալու համար ԼՈՒՐԵՐ.com-ի թղթակիցը զրուցեց «ORSIS» ընկերության փաստաբան Ալեքսանդր Սիրունյանի հետ: 

«Ընկերությունը մտահոգություն ունի, որ ՀՀ ՊՆ պաշտոնատար անձինք ապօրինի, օրենքով չնախատեսված հիմքերով ձախողել են ռազմամթերքի մատակարարման մրցույթը: Դրանով ձախողել են որակյալ ռազմամթերքի  մատակարարումը հայկական բանակին: Ռուսական կողմն այն դժգոհությունն ունի, որ ՀՀ պաշտպանության նախարարի տեղակալ Մակար Ղամբարյանն ապօրինի քայլով փորձ էր կատարել «ORSIS» ընկերությունից բռնագանձել 105 մլն դրամ, որը մենք կանխեցինք: Ռուսական կողմը էլի մտահոգություն ունի, որ այդ պաշտոնական դիրքի չարաշահումը պետք է ճիշտ գնահատական ստանա»,- ասաց փաստաբանը:  

Սիրունյանը նշեց, որ խոսքն այնպիսի ռազմամթերքի մասին է, որը ԱՊՀ տարածքում միայն նրանք են արտադրում. «Ընկերությունը մասնակցել է ՊՆ հայտարարած մրցույթին ու չի անցել, քանի որ ըստ ՊՆ հանձնաժողովի՝ իրենք չապացուցեցին, որ ունակ են նմանատիպ աշխատանքներ կատարել»:

Փաստաբանի խոսքով՝ այս ընկերության հետ նախարարությունն ունի այլ գործող պայմանագրեր: 

«Մրցույթի սկզբում հայկական կողմը պահանջվող հիմնական փաստաթղթերից բացի ցանկանում է տեսնել այլ փաստաթղթեր: Ընկերությունը ներկայացնում է դրանք: Օրինակ՝ փաստաթուղթ, որ տվյալ զինամթերքը առաքվել է այլ պետություն: Ընկերությունը կատարում է այդ պահանջը՝ բերելով փաստաթուղթ այլ պետությունից, ում մատակարարել է: Կամ պահանջում է ներկայացնել փաստաթուղթ, որ զինամթերքը կոնկրետ քանակի, կոնկրետ ժամանակահատվածում հասել է այլ պետություն: Ու նորից կատարվում է պահանջը»,- ընդգծեց փաստաբանը: 

Ըստ Սիրունյանի՝ այդ ամենից հետո էլ ռուսական ընկերությունը չի կարողանում ապացուցել, որ ինքը նախկինում նման մատակարարումներ է արել:

«Մենք դիմել ենք ու քրեական գործ է հարուցվել: Մենք կասկած չունենք, որ այս ամենում պատահականություն չկա»,- պնդում է փաստաբանը:

 Սիրունյանի դիտարկմամբ՝ բոլոր պարտավորվածությունները կատարվել են՝ նույնիսկ ներկայացվել է 105 մլն դրամ երաշխիք, որը պետք է օգտագործվեր այն դեպքում, երբ պայմանագիր կնքվեր, սկսվեր համագործակցություն: Ու եթե ինչ-որ խնդիրներ առաջանային, ՊՆ-ը կարողանա կասեցնել գործընթացը: Այլ կերպ ասած՝ ընկերությունը 105 մլն դրամով ապահովում է իր ապագա համագործակցությունը:

«Գումարը հնարավոր է  բռնագանձել, եթե մրցույթը կայանար, պայմանգիր կնքվեր ու սկսեին համագործակցություն: Չկայացած մրցույթում նախարարի տեղակալ Մակար Ղամբարյանը դիմում  է բանկ՝ ասելով, որ ընկերությունը  չի կատարել իր պայմանագրային պարտավորությունները, խնդրում եմ գումարը փոխանցել ՊՆ հաշվին»,- ասաց նա:

Փաստաբանը հույս հայտնեց, որ գործը կքննվի հատուկ քննչական ծառայությունում: