Խոսրովի արգելոցի 1/5-րդ մասն ինչ-որ օլիգարխի՞ է տրվել

Բնապահպան, իրավաբան Արթուր Գրիգորյանն այսօր Խոսրովի արգելոցի շուրջ վերջին զարգացումների առթիվ հրավիրված մամուլի ասուլիսին հայտարարեց, որ իրենք արգելոցի էլեկտրոնային կայքում հայտնաբերել են, որ արգելոցի տարածքը մոտ 6000 հեկտարով կրճատվել է։

«Խոսրովի արգելոցի կայքի առաջին էջում գրված է, որ արգելոցը բաղկացած է 5 տեղամասից՝ Գառնի, Կաքավաբերդ, Ուրծի, Խոսրով, Խաչասար, որի ընդհանուր մակերեսը կազմում է 29,158 հա: Միաժամանակ, նույն կայքի առաջին էջում տեսնում ենք, որ գրված է, թե ներկայումս արգելոցը 4 տեղամասից է բաղկացած, և Ուրծի տեղամասը հանվել է արգելոցից՝ ընդհանուր տարածք սահմանելով 23, 000 հա: Հարց է ծագում, ինչպե՞ս է 6000 հա-ով կրճատվել արգելոցը, ո՞վ է Ուրծի տեղամասը հանել այդ նշանակությունից»,- ասաց Գրիգորյանը:

Նա նշեց նաև, որ կարևոր խնդիր է իմանալը, թե երբ է տեղի ունեցել այդ փոփոխությունը, և այսօր ինչ կարգավիճակ ունի արգելոցից կրճատված 6000 հեկտարը:

Արթուր Գրիգորյանը նկատեց, որ դեռևս չեն ցանկանում բացել չակերտները, քանի որ լիարժեք տեղեկատվության չեն տիրապետում, սակայն, ըստ նրա, վերոնշյալ տարածքը հենց այնպես չի հանվել արգելոցի տարածքից։

«Նույն տարածքը, որն Ուրծասար է կոչվում, պատկանում է հայտնի օլիգարխներից մեկին»,- ասաց բնապահպանը: