Միլիոններ՝ մեկ ամսում. գործուղումների ոդիսականը չի ավարտվել
Վերլուծական
«Արտասահմանյան պաշտոնական գործուղումներ» ծրագրով նախատեսված միջոցների հաշվին կատարված ֆինանսավորմամբ՝ կառավարության անդամների գործուղումների համար 2019 թվականի սեպտեմբեր ամսին ծախսվել է 187 մլն 410 հազար դրամ, ինչը 2018-ի նույն ժամանակահատվածի համեմատ ավել է շուրջ 142 մլն-ով, կամ 410 %-ով (45 մլն 684 հազար դրամ), իսկ 2017թ-ի սեպտեմբերի համեմատ 161 մլն-ով կամ 603 %-ով (26 մլն 641 հազար դրամ):
Իհարկե, հարց է առաջանում, թե կառավարության պաշտոնյաները այդ ինչ դարակազմիկ ձեռքբերումների են հասել իրենց՝ ոչ պակաս դարակազմիկ (գնի առումով) գործուղումների արդյունքում: Դա հասկանալու համար օգնության են գալիս վերոնշյալ պաշտոնյաների պաշտոնական հաշվետվությունները: Օրինակ ՀՀ Բարձր տեխնոլոգիական արդյունաբերության նախարար Հակոբ Արշակյանի տեղակալ Արմեն Աբրոյանը սեպտեմբերի 1-4-ը Սլովենիայում էր, հաշվետվությունից երևում է, որ նպատակը՝ փորձի փոխանակման մասին պայմանավորվելն էր: Ստացվել է, թե ոչ՝ կիմանանք հետագայում: Կրթության, գիտության, մշակույթի և սպորտի նախարարի տեղակալ Արայիկ Խզմալյանը սեպտեմբերի 4-7-ը Իտալիայի Հանրապետությունում էր, վերջինս մասնակցում էր «Սալենտո» 16-րդ միջազգային կինոփառատոնին: Տարածքային կառավարման և ենթակառուցվածքների նախարար Սուրեն Պապիկյանը սեպտեմբերի 9-11-ը Աբու Դաբիում էր և վերջինիս ներկայացրած հաշվետվությունից պարզ է դառնում, որ երեք օրերի ընթացքում միակ ձեռքբերումը եղել է այն, որ համաձայնություն է ձեռք բերվել շարունակել համագործակցությունը Համաշխարհային էներգետիկ խորհրդի հետ:
Իհարկե, ինչ գործուղում՝ առանց քաղավիացիայի պետ Տաթևիկ Ռևազյանի: Վերջինս սեպտեմբերի 5-7-ը Թուրքմենստանի մայրաքաղաք Աշխաբադում էր և քննարկում էր «Թուրքմենական ավիաուղիներ» ավիաընկերության կողմից Աշգաբադ-Երևան-Աշգաբադ չվերթերի վերսկսումը, օդային փոխադրումների իրավունքի 5-րդ ազատության կիրառմամբ՝ Աշգաբադից Երևան և եվրոպական քաղաքներ չվերթերի հնարավորությունը: Եթե RynaAir-ի ոդիսականը ի վերջո տապալվի, ապա ինչ խոսք՝ Ռևազյանը նոր ու շատ լուրջ խաղաքարտ կունենա: Արայիկ Հարությունյանի մյուս տեղակալը՝ Նարինե Խաչատուրյանը, սեպտեմբերի 12-14-ը Ուզբեկստանի Կոկանդ քաղաքում էր, մասնակցում էր Կոկանդի ժողովրդակիրառական արվեստի փառատոնին: Եվ սա դեռ ամենը չէ, հաշվետվության վերջում հպարտորեն շեշտվում է, որ նախարարի տեղակալը հենց այնպես չէ երկու օր անցկացրել Կոկանդում, նա հույժ կարևոր առաքելություն է կատարել՝ Թամերլանի թանգարանում ներկաներին ավետել է Շահ Ջահանի կնոջ՝ Մումթազ Մահալիի հայկական ծագման մասին :
Շրջական միջավայրի նախարար Էրիկ Գրիգորյանը սեպտեմբերի 8-11-ը Հնդկաստանի մայրաքաղաք Նյու Դեյլիում էր: Առաջին հայացքից կարող է թվալ, որ նախարարը այնտեղ է մեկնել փորձի փոխանակման համար, հասկանալու համար, թե այլ ինչ ճանապարհներով կարելի է աղտոտել ՀՀ շրջակա միջավայրը ՝ հաշվի առնելով Նյու Դեյլիի համաշխարհային վարկը այս հարցում: Սակայն ոչ, պարզվում է՝ Գրիգորյանը մասնակցում էր ՄԱԿ-ի «Անապատացման դեմ պայքարի մասին» կոնվենցիայի Կողմերի բարձրաստիճան հատվածի 14-րդ հանդիպմանը:
Իրականում գործուղումասեր մեր մյուս պաշտոնյաների հաշվետվությունները ավելի բովանդակալից չեն: Սրանք ընդամենը մի քանի օրինակներ էին, թե ինչպես է Հայաստանի հեղափոխական և բյուջե խնայող կառավարությունը ցփնում հարկատուների գրպանից ստացված միլիոնները: Կարելի է խորհուրդ տալ միայն շարունակել նույն ոճով, եթե, իհարկե, հեղափոխական կառավարության գերնպատակը նախկինների փառահեղ ռեկորդները խփելն է…
ՈՒՂԻՂ ԵԹԵՐ
Ամենադիտված 
«Խոպան գնալուց առաջ գնացել էին աներոջ տուն՝ հաջող անելու». մանրամասներ վթարից մահացած ընտանիքի մասին
