Որքան պիտի սպասեն ներդրողն ու քաղաքացին

Այսօր ԱԺ-ում ՀՀ վարչապետ Նիկոլ Փաշինյանի մասնակցությամբ քննարկվում էր 2020 թվականի բյուջեի նախագիծը, որտեղ հիմանական քննարկումը տնտեսական աճի շուրջ ծավալվեց: Ընդդիմադիր գործիչները տնտեսական աճը հեղափոխական չհամարեցին: ԲՀԿ խմբակցության պատգամավոր Սերգեյ Բագրատյանն, այնուամենայնիվ, գտավ տնտեսական աճին խոչընդոտող հիմնական օբյեկտիվ պատճառները:

«Հեղափոխությունից հետո պետք էր մի պահ շունչ քաշել: Հեղափոխությունն առաջին հերթին պետք է անկում գրանցի տնտեսական ոլորտում, հետո նոր իրողություններ, նոր խաղի կանոններ գրանցվեն ու արդեն նոր ներդրումները բերեն տնտեսական աճի: Հիմա մենք անկում չգրանցեցինք, բայց դադար պետք է տրվեր, այս բյուջեն այդ պաուզան է»,- նշել է Բագրատյանը:

Այն հարցին, թե ինչով են պայմանավորված Հայաստանում ներդրումների անընդհատ նվազումը, արդյոք դա ներքաղաքական իրադարձությունների պատճառով չէ, պատգամավորը պատասխանեց. «Քաղաքական իրողությունները թելադրում են տնտեսության և հատկապես ներդրումային քաղաքականության որդեգրում: Այսինքն՝ ներդրողը նայում է բոլոր երկրներին, նայում է այդ երկրների տնտեսական քարտեզին, ըստ այդ քարտեզի կայունության  էլ ներդրումները հոսում են այս կամ այն երկիր: Հեղափոխությունը սկզբնական փուլում չի ձևավորում կողմնորոշիչներ: Հեղափոխությունից հետո ներդրողները սպասում են, որ ջրերը զուլալվեն, հասկանան՝ խաղի ինչ կանոններ են առաջադրվում իրենց»:

ԼՈՒՐԵՐ.com-ի թղթակիցը փորձեց պարզել՝  արդյոք չի անցել սպասման ժամկետը և դեռ ինչքան պիտի սպասեն ներդրողն ու  քաղաքացին: Ի պատասխան այս հարցի՝ Բագրատյանը պնդեց, որ այլևս սպասելու կարիք ու ժամանակ չկա:

«Հիմա բոլորի համար պիտի պարզ լինի՝ ինչ ռեժիմով ենք մենք շարունակում ղեկավարել երկիրը: Օրինակ՝ Արժույթի միջազգային հիմնադրամը հավաստիացրեց, որ խրախուսում է Հայաստանի՝ այս իրավիճակում տնտեսական մոտեցումները: Սա նշանակում է, որ նրանք կանաչ լույս են վառում մեզ համար: Այսինքն՝ պետությունը  չի վարում տոտալ ճնշումների քաղաքականություն: Մեզ մոտ կառավարությունը չորդեգրեց եղած բիզնեսները ջարդելու քաղաքականություն, որպեսզի նոր բիզնեսմեններ ի հայտ գային, եթե այդպես վարվեր, հավանաբար բացասական արձագանք կունենայինք Արժույքի միջազգային հիմնադրամի կողմից»:

Բագրատյանը կարծում է, որ  տնտեսական աճը քաղաքացուն ծառայեցնելու համար պետք է ստեղծել այն գործիքակազմը, որը կապահովի այդ աճի բաշխման արդյունավետությունը: Այսինքն՝ աճի որոշակի տոկոսներ բաժին հասնեն անապահով խավերին, որպեսզի հասարակ աշխատողն ու քաղաքացին իր կյանքում փոփոխություն տեսնի: 

«Նախկինում մենք քննադատում էինք իշխանություններին, որ նրանք ներառականություն չէին ապահովում, այսինքն՝ խիստ բևեռացված էր ազգային հարստության բաշխումը: Վերևներում տասնապատիկ, հարյուրապատիկ ավել էին ստանում, քան ներքևներում: Նոր իրողության պայմաններում այս մեխանիզմը պետք է փոխվի: Իշխանությունը խոստացել է, որ քաղաքացին կտեսնի այդ փոփոխությունը, մենք, որպես ընդդիմություն, հետևում ենք, որ այդ խոստումն իրականանա»,- ասաց Բագրատյանը:

Պատգամավորը մտահոգություն հայտնեց, որ իշխանության՝ տնտեսական աճին ուղղված քայլերը փոքր-ինչ դանդաղ են. «Շատ դանդաղ են գործում այն ինստիտուտները, որոնք նպաստում են տնտեսության զարգացմանը: Մի օրինակ բերեմ. շինթույլտվություններ ստանալու համար մարդիկ սպասում են 7-8  ամիս, սա տնտեսական զարգացմանը խոչընդոտում է: Հիմա ես օրենք եմ մշակում, ըստ որի, եթե 15 օրում շինթույլտվություն չի տրվում, ապա կարող են առանց ստանալու սկսել աշխատանքները»:

Բագրատյանի համոզմամբ իր մշակած օրենքը կնպաստի տնտեսության գոնե այդ ոլորտի արագ զարգացմանը:

«Ընդդիմությունը միայն քննադատելու համար չէ, մենք նաև լուծումներ ենք առաջարկում: Ուրիշ հարց է, որ մեր առաջարկները հաճախ չեն ընդունվում, և չեն քննարկվում, բայց իշխանությունը պետք է ընդունի, որ ընդդիմությունը կառավարության բաղկացուցիչ մասն է: Մեր բոլորի նպատակը մեկն է՝ պետության զարգացումը»,-եզրափակեց պատգամավորը: