Առավել ճանաչելի դարձնել հայ մշակույթը հունգարացիների շրջանում

ՀՀ մշակույթի նախարար Հասմիկ Պողոսյանն ընդունել է Հունգարիայի հայ ազգային ինքնավարության պատվիրակությանը: Հանդիպմանը մասնակցել են Հունգարիայի հայ ազգային ինքնավարության նախագահ Սևան Սարկիսյանը, փոխնախագահներ Նիկողոս Հակոբյանը և Ալեքս Ավանեսյանը, ինչպես նաև «Հայաստան-Հունգարիա» մշակութային կապերի և համագործակցության ընկերության նախագահ Անահիտ Սիմոնյանը:

Հանդիպման ընթացքում քննարկվել են հունգարահայ համայնքի` Հայ գրատպության 500-ամյակի ծրագրերին մասնակցության հնարավորությունները: Պատվիրակության անդամները նախարարին են ներկայացրել ու մեկ անգամ ևս հաստատել այն հիմնական ուղղություններն ու չափանիշները, որոնցով առաջնորդվում են իրենց գործունեության ընթացքում. այն է` պահպանել մշակութային ինքնությունը Հունգարիայում, առավել ճանաչելի դարձնել հայ մշակույթը հունգարացիների շրջանում, հունգար ժողովրդին մոտիկից ծանոթացնել հայկական ավանդույթներին, մշակույթին ու դարավոր պատմությանը և իհարկե սերտորեն համագործակցել հայրենիքի հետ: Հյուրերը շնորհակալություն են հայտնել նախարարին համայնքի հետ ակտիվ աշխատելու ու այն հոգածության համար, որը մշտապես ցուցաբերվել է Հունգարիայի հայ ազգային ինքնավարության հանդեպ: Նրանք համոզմունք են հայտնել, որ այս անգամ ևս նախարարությունը կսատարի իրենց և կաջակցի հայաստանյան լավագույն համույթների ու նվագախմբերի հյուրախաղերը կազմակերպելու, ինչպես նաև 2012 թ. Հունգարիայի 15 քաղաքներում հայ գրատպության 500-ամյակին նվիրված գրքի ցուցահանդեսներ անցկացնելու գործում: 

Նախարար Հասմիկ Պողոսյանն իր խոսքում նշել է, որ համայնքի հետ ձևավորված բարեկամական կապերն անդառնալի են և հյուրերին ծանոթացրել է Երևանը գրքի 2012 թ. համաշխարհային մայրաքաղաք հռչակմանն ու հայ գրատպության 500-ամյակին նվիրված Հայաստանում ու արտերկրում անցկացվելիք ծրագրերին ու միջոցառումներին և հավաստել, որ հունգարահայ համայնքը անշուշտ կունենա իր դերակատարումը լայնամասշտաբ այդ նախագծերում: 
Հանդիպման ավարտին կողմերը ստորագրել են «ՀՀ մշակույթի նախարարության և Հունգարիայի հայ ազգային ինքնավարության միջև մշակութային համագործակցության մասին» պայմանագիր: