«Հայոց ցեղասպանության վերաբերյալ բանաձևի ընդունումն ամենևին էլ չնչին իրադարձություն չէ»
Հայաստան
ԱՄՆ Ներկայացուցիչների պալատի կողմից Հայոց ցեղասպանության վերաբերյալ բանաձևի ընդունմանն արձագանքել է Թուրքիան։ Մասնավորապես, Թուրքիայի նախագահ Ռեջեփ Թայիփ Էրդողանն ասել է, որ ԱՄՆ-ում «մոռացել են հայկական ահաբեկչության մասին», նա նաև նշել է, որ իրենք խստորեն դատապարտում են բանաձևի ընդունումը: Բանաձևի ընդունման, Թուրքիայի արձագանքի, հայկական կողմի հետագա անելիքների մասին ԼՈՒՐԵՐ․com-ը զրուցեց թուրքագետ Ռուբեն Սաֆրաստյանի հետ։
«Թուրքիայի նախագահը որևէ նոր բան չի ասել, կրկնել է տասնամյակներ շարունակ ասածը։ Ցեղասպանության մասին ստերի տարածումը և դրա փաստի մերժումը վաղուց դարձել է Թուրքիայի պաշտոնական քաղաքականության մի մասը և Էրդողանը շարունակում է այն։ Նրա արձագանքն առաջին հերթին ուղղված է Թուրքիայի ազգաբնակչության ներքին խնդիրները լուծելուն։ Ցույց է տալիս, որ Թուրքիան շարունակելու է պատմական իրականության մասին կեղծիքներ տարածելը։ Ես կարծում եմ՝ մեկ անգամ ևս պետք է շատ ուժեղ հարված տանք ստերին, որոնք տարածում է նա»,- նշեց թուրքագետը։
Մինչ Էրդողանի խոսքը, Թուրքիայի արտգործնախարար Մևլութ Չավուշօղլուն մեկնաբանել էր բանաձևի ընդունումը՝ այն որակելով «ամոթալի»: Անդրադառնալով ԱԳ նախարարի արձագանքին՝ թուրքագետը նշեց․ «Ամոթալին Թուրքիայի պահվածքն է, գոնե այս առիթն օգտագործի և կարողանա ճշմարտությունն արտաբերել, բայց պաշտոնական Թուրքիան իր մեջ ուժ չի գտնում դա իրականացնելու»,- ասաց Սաֆրաստյանը։
Նրա խոսքով՝ բանաձևի ընդունմանը ԱՄՆ կոնգրեսի կողմից կարևոր խթան կարող է հանդիսանալ ամբողջ աշխարհում Հայոց ցեղասպանության ճանաչման գործընթացն ավելի արագացնելու հարցում․ «Մեծ հեղինակությունը, որը վայելում է ԱՄՆ-ն, այլ երկրներին կդրդի ներգրավվել այդ գործընթացի մեջ։ Բացի քաղաքական նշանակությունից, այն ունի նաև բարոյական նշանակություն, որովհետև հայտնի է, որ ԱՄՆ-ն՝ ի դեմս Թուրքիայում Ամերիկայի դեսպան Հենրի Մորգենթաուի, ցեղասպանության տարիներին փորձել է հնարավորինս ճշմարտությունը հասցնել աշխարհին ոճրագործության մասին։ Հիշենք նաև, որ ԱՄՆ-ն մեծ օգնություն է ցուցաբերել ցեղասպանությունից փրկված հայերին։ Անբարոյականություն էր, որ մինչև հիմա ԱՄՆ-ն չէր ընդունում քաղաքական պատճառներով, բայց հիմա, երբ ընդունվեց, այս քայլը ճիշտ և բարոյական է»,- նշեց թուրքագետը՝ նկատելով, որ Հայոց ցեղասպանության վերաբերյալ բանաձևի ընդունումն ամենևին էլ չնչին բան չէ, այն մեծ իրադարձություն էր։
Սոնա Հարությունյան
ՈՒՂԻՂ ԵԹԵՐ
Ամենադիտված 
Նորայրը մեկնել էր հանգստի, արդեն վերադառնում է. նոր մանրամասներ՝ ողբերգական դեպքից
