«Հրապարակ». ԲՀԿ-ն ՏԻՄ ընտրություններում կենաց-մահու կռիվ է տալու

Ըստ հավաստի աղբյուրների՝ ԲՀԿ «հայրերին» ահավոր դուր չեն եկել ՀՀԿ-ԲՀԿ վերջին շփումները՝ Գյումրիում քաղաքապետի հարցում համաձայնությունը, Պալաչի ներողությունն ու Լոնդոնի օլիմպիադայի՝ Սերժ Սարգսյանի ու Ծառուկյանի նույն ինքնաթիռով թռչելու պարագան: Եվ որոշ տվյալներով` Հունաստանում, հարազատ կղզում հանգստացող Ռոբերտ Քոչարյանը, ըստ նույն աղբյուրների, տագնապել է՝ հանկարծ չուշանա՞ ու խաղը ձեռքից բաց թողնի:

Ուստի արագ ռեժիմով հետ կանչվեցին մինչ այս ռազմահայրենասիրական մեծ համբերություն դրսևորած ԲՀԿ փոխնախարարներն ու փոխմարզպետները: Հայտարարվեց, որ կրկին վերցվելու է հայոց հողի ամեն միլմետրը՝ ՏԻՄ ընտրություններով: ԲՀԿ-ն ՏԻՄ ընտրություններում կենաց-մահու կռիվ է տալու, ոչ մի բանի առջև կանգ չի առնելու (հետաքրքիր է՝ այս ընտրությունների ստավկան է՞լ է տասը հազարից սկսվելու) խաղն իրենով անելու համար. առաջին հերթին՝ հոգեբանական առումով, որպեսզի մարդկային-քաղաքական ռեսուրսը նախագահականից առաջ դեպի իրեն քաշի:

Այս խաղում մեկ այլ նրբություն էլ կա. ԲՀԿ այս դրսևորումը հաճելի է ոչ միայն Քոչարյանի, այլև օգտակար է Ռուսաստանի համար, հենց այնպես չէր Հայաստան ժամանած Նարիշկինը հայտարարում, որ աշնանը կլուծվի Հայաստանի՝ Եվրասիական միությանը մասնակցության խնդիրը: Եթե նախագահական ընտրությունների շեմին և ընթացքում այս հարցը Ռուսաստանը չլուծի, ապա երբեք և այլևս չի կարողանա լուծել: Իսկ այդ հարցում ԲՀԿ-ն, Քոչարյանը և հարակիցները իսկական «ռազմավարական գործընկերներ» են: